Sonaly Acosta, Coordinador di Mike Eman
ORANJESTAD (AAN): Señora Sonaly Acosta, coordinador di Prome Minister Mike Eman, den entrevista cu DIARIO a remarca cu un iniciativa hopi importante ta e bishitanan den bario cu Prome Minister Eman ta haci regularmente, algo cu e mandatario a haci durante campaña electoral y awo den gobernacion ta continua cu esaki.
Señora Acosta a bisa cu ta hopi importante pa gobernantenan bishita barionan pa scucha y sa e necesidadnan di nos comunidad. Haciendo asina, ta duna oportunidad pa inventarisa y por bin cu plan di accion conhuntamente cu e departamentonan concerni, di acuerdo cu e nesecidadnan. Pa e parti di limpiesa, señora Acosta a expresa cu Aruba no ta manera a lag’e algun aña pasa y tin hopi trabou pa haci. Loke ta mas importante den caso di un isla limpi, ta prevencion.
“Ora e mandatario mes ta drenta den casnan y scucha y señala problemanan, e por actua riba nan. Ora e minister ta sinta den su oficina, e problema ta escala, su prioridad ta bira pa paga candela y no pa traha na un manera preventivo”, señora Acosta a señala.
