Capitan a tuma decision ultimo momento
ORANJESTAD (AAN): E barco crucero AIDAbella, di e linea di crucero AIDA tabata programa pa yega Aruba riba Diahuebs mainta 8:00 am, pa keda eynan te 6:00 pm.
Apesar cu a solicita un Tugboat pa yuda den e proceso di mara na Waf, toch e Capitan di e barco crucero no tabata confortabel cu e situacion di biento y lama.
No obstante e esfuersonan di APA y e agencia di e barco pa asisti e Capitan lo mas posibel pa asina toch e lo por drenta na un manera sigur. Sinembargo toch e Capitan a tuma e decision di cancela e bishita di e barco crusero pa Aruba.
Esaki sigur ta lamentable debi cu cancelacion di un barco crucero tin hopi consecuencia financiero pa APA y tambe pa companianan cu ta ofrece tour y demas servicionan aki na Aruba, sin menciona tur e negoshinan cu ta beneicia di e actividad economico di e industria aki.
APA sigur lo tuma contacto cu e compania di crucero pa dialoga den strategianan pa evita e tipo di situacionnan aki ripiti. Departamento Nautico di APA tin profesionalnan cu hopi experiencia y ta custuma cu condicionnan climatico cu tin actualmente na Aruba.
APA tambe a tuma nota di informacionnan incorecto cu ta circula riba medionan social y ta enfatisa cu e decision pa a cancela e bishita di AIDAbella di Diahuebs mainta tabata un decision di e Capitan di e barco crucero mes.
