Danki na cooperacion cu Alliance Française Aruba
ORANJESTAD (AAN): Eric Vinck, Presidente di Alliance Française (AFA) aki na Aruba, a duna di conoce durante un conferencia di prensa cu nan ta promove diferente actividad y nan obhetivo ta pa promove idioma Frances pero tambe e cultura Frances.
Aworaki nan ta mas dedica na e lenga pasobra e lenga ta yama mas na e cultura y e motivo di e conferencia di prensa tabata pa confirma un bon cooperacion entre Biblioteca Nacional y Alliance Française.
Vinck a laga sa cu e cooperacion aki a cuminsa dos aña pasa y esey a bin door di e necesidad, durante e pandemia, di e personanan cu tabata kier haci algo of refresca nan Frances.
Di e forma aki por a cuminsa cu varios curso y awendia ta bezig cu e cursonan aki, a bisa.
Vinck a agrega cu door di e cooperacion aki cu BNA nan tabata kier wak con e oferta di bukinan na Frances ta na esnan cu kier papia Frances. A mira cu e bukinan no tabata hopi y a mira cu te hasta e bukinan a wordo regala pasobra nan a bira bieu.
AFA a pensa cu un manera cu nan por a gradici e cooperacion di Biblioteca Nacional ta door di percura cu nan por entrega bukinan pa asina engrandece parti di e coleccion cu bukinan na Frances.
Di e forma aki, awor BNA ta conta cu un huki cu yama 'Coleccion Skina Frances' cual ta disponibel pa tur esnan kier siña mas di idioma Frances.
Yosmar Sneek, Hefe di Servicio Publico na BNA a expresa cu palabranan di danki na Aliansa Frances como tambe na Gregory Leto, coordinador di e cursonan y na Christian Mongeliaz, consul honorario di Francia na Aruba cu nan por a haya e coleccion di buki na Frances, cu aworaki ta chikito pero cu lo sigui crece.
Consul Christian Mongeliaz a laga sa cu den pasado e cursonan di Frances a haya bon acogida y tabata tin gruponan di entre 9 pa 10 persona. Aworaki, e curso nobo ta bay cuminsa den luna di October.
Na final di e conferencia di prensa Sr. Vinck a haci un donacion simbolico di buki na Frances na Biblioteca Nacional.
