ORANJESTAD (AAN): Recientemente Biblioteca Nacional a ricibi buki cu ta elabora riba e tradicion di e isla, di uza matanan pa metanan medicinal y yuda comunidad di algo.
Biblioteca a ricibi e buki E guia practico di TRAMIL di mata medicinal di
Caribe pa cuido primario di salud. E ta un publicacion den Papiamento desaroya pa e Organizacion Tramil.
E guia ta ofrece informacion accesibel riba 38 especie di mata medicinal comun den
Caribe, cu aplicacion den cuido primario di salud. E publicacion ta basa riba investigacion cientifico y experiencia regional, y ta forma parti di un esfuerso pa haci conocemento tradicional mas accesibel y responsabel pa uzo den comunidad. E guia ta inclui informacion practico riba uzo di mata, preparacion y orientacion pa uzo sigur.
E buki a wordo presenta door di biologo John de Freitas na hefe suplente di Biblioteca Nacional Aruba, sra. Lilian Semeleer.
E organizacion Tramil (Traditional Medicine for the Islands) ta un red Caribense activo for di
1982, cu ta enfoca riba promocion y documentacion di medicina tradicional den region.
Tramil ta valida uzo di mata medicinal como parti di su esfuerso pa reforca cuido primario di salud den Caribe. Pa esaki, dato ta wordo colecta via encuesta den diferente paisnan Caribense. Especienan di mata cu ta uza pa minimalmente 10% di e participantenan ta pasa pa un proceso di validacion cientifico. E proceso aki ta wordo ehecuta na universidad- y laboratorionan den region y riba continente Sur Americano, segun protocol cientifico estableci.
E redaccion local di e edicion na papiamentu tabata den man di John de Freitas, kende ta biologo.
