ORANJESTAD (AAN): Recientemente Biblioteca a haya 4 ehemplar di e buki nobo pa mucha titula ‘Y ami awo?’ di escritora Rachelle Goedgedrag.
Rachelle a entrega esakinan na hefe suplente sra. Lilian Semeleer.
E storia aki ta trata con un parha manera Rita, un buladuifi, tin cu busca un cas nobo despues cu nan a rosa un pida mondi cu e tabata yama cas. Rita ta bin conoce diferente bestia cu ta proteha pa ley na Aruba y e ta puntra su mes: ‘Y ami awo?” Lesa y haya sa ken tur Rita a conoce cu ta proteha y tambe con ela haya un luga cu e por yama cas.
Meta di e buki ta pa introduci e bestianan proteha, crea concientisacion riba nos naturalesa y amplia conocmento di nos areanan local.
Rachelle Lue-Goedgedrag ta un autor Arubiano cu ta encanta skirbi storia cu ta laga e lesado drenta den un mundo yena di aventura, sinti diferente emocion y conecta cu e personahenan. Den su storianan, e ta combina su interes pa psicologia cu su amor pa nos idioma Papiamento, creando suspenso cu ta tene e lesado curioso pa sa kico lo pasa despues.
Su pasion pa skirbi a cuminsa door di hunga cu palabra y crea poesia, cu pocopoco a crece bira storia y despues novela. Den su storianan, e ta duna bida na emocion, relacion y situacionnan cu hende por reconoce. Su manera di skirbi ta facil y natural, cu dialogonan cu ta zona manera nos ta papia cu otro na Aruba.
Cu su prome buki, ‘Louella’, Rachelle a haci su prome paso den mundo literario na 2024. E novela a capta hopi atencion y a laga hopi lesado curioso pa mas. Despues a sigui Y ami awo?, su prome buki pa mucha, na 2026. Cu e buki aki, Rachelle kier pone enfasis riba importancia di cuida nos naturalesa y bestianan, y concientisa grandi y chikito di e rol cu nos tin den esaki.
Banda di ta autor, Rachelle ta docente di psicologia, Decano Central, PR y ta forma parti di International Affairs di Colegio EPI na Aruba. Tambe e ta fundador di ‘Fundacion Conecta y Briya’, cu ta crea oportunidad pa trece hende hunto pa medio di buki, proyectonan educativo, actividadnan social y competencia di puzzel.
