Durante luna di April
ORANJESTAD (AAN): E siman aki, Oficina Central di Estadistica (CBS) a emiti publicacion di nan calculo di Prijs di Indice di Consumidor pa luna di April 2025.
Den e esaki tambe a pone nan calculo pa e “Bestaansminimum”. Esaki ta pa un hogar consistiendo di 2 adulto y dos mucha (edad 0-15 aña) na April 2025 ta Afl. 5,513, un, y esey ta un subida di 6 Florin compara cu Maart 2025 (Afl. 5,507).
E bestaansminimum pa un hogar di 1 adulto ta Afl. 2,625, un subida di Afl. 3 compara cu Maart 2025 (Afl. 2,622).
E bestaansminimum ta e nivel minimo di entrada cual ta wordo percibi cu ta necesario pa logra mantene un nivel di bida adecuado den un cierto pais. Usualmente e bestaansminimum ta wordo determina door di calcula e gasto di tur e recursonan esencial cu un adulto ta consumi den un luna of aña.
Generalmente esaki ta wordo yama un indice basico di necesidad, y e ta varia segun e prijs di cuminda, paña, vivienda, transporte y otro articulonan den e “canasta”. Escalanan di ekivalencia ta wordo usa pa ahusta e nivel minimo di entrada percibi pa hogarnan di diferente tamaño y composicion. E escala ta asigna un peso di 1.0 pa e prome adulto y 0.5 pa cada adulto adicional den e hogar (edad 16+) y un peso di 0.3 pa cada mucha (edad 0-15 aña). E bestaansminimum ta basa riba cifranan di e rapport “Bestaansminimum 2010” y ta wordo actualisa mensualmente pa cu inflacion usando e CPI mensual. E unidad di referencia den e rapport aki ta di un hogar cu ta consisti di 2 adulto y dos mucha (edad 0-15 aña).
Na April 2025 e bestaansminimum mensual pa un hogar cu ta consisti di 2 adulto y dos mucha (edad 0-15 aña) (Afl. 5,513) ta mustra un subida di 16 Florin compara cu April 2024 (Afl. 5,497) y a wordo causa principalmente door di subidanan di Afl. 8 y Afl. 7 den e sectornan di “Cuminda y bebida no-alcoholico” y “Mobilario”. E caida mas grandi na April 2025 a wordo registra den e sector di “Transporte” (Afl. -11).
Na April 2025 e bestaansminimum mensual pa un hogar cu ta consisti di un solo adulto ta Afl. 2,625, cual ta representa un deficit di entrada di Afl 639, un subida di Afl. 7 compara cu e deficit observa un aña pasa (Afl. 632). E deficit aki ta e di dos mas halto registra den un periodo di 6 aña pa luna di April.
