Indice di Prijs di Consumo pa luna di Januari 2023
ORANJESTAD (AAN): E siman aki, Oficina Central di Estadistica (CBS) a presenta e asina yama Indice di Prijs di Consumo (CPI).
E CPI pa luna di Januari 2023 ta 106.69, loke ta representa un subida di 0.3% compara cu e indice di December 2022 (106.37). E cambio di e CPI pa e ultimo 12 lunanan (Januari 2022 te cu Januari 2023) ta 6.6%, un subida di 3.3 punto di porcentahe (ppt) compara cu e periodo corespondiente di aña pasa (3.3%).
E promedio anual (ultimo 24 luna) di e tasa di inflacion pa e periodonan di Februari 2021 te cu Januari 2022 y Februari 2022 te cu Januari 2023 ta 5.8%, un subida di 4.6 ppt compara cu e 1.2% registra den e periodonan di Februari 2020 te cu Januari 2021 y Februari 2021 te cu Januari 2022.
Durante e luna aki, 7 di e diesdos sectornan a registra subida di prijs. E subidanan cu tabata tin e mayor efecto riba e CPI a worde registra pa e sectornan di “Mobilario” (6.7%) y “Vivienda” (1.0%), causando un efecto di respectivamente, 0.58 y 0.25 ppt. E subidanan den e restante sectornan a contribui cu un efecto di 0.37 ppt riba e CPI di Januari 2023.
E subidanan aki a worde contraresta parcialmente door di principalmente caida den e indicenan di e sectornan di “Recreaccion y cultura” (-4.4%) y “Paña y sapato” (-9.1%) cu a contribui cu un efecto di respectivamente, -0.43 y -0.23 ppt riba e CPI di Januari 2023. E caidanan den e restante sectornan a contribui cu un efecto di -0.25 ppt riba e CPI di Januari 2023.
E subida den e sector di “Mobilario” a worde causa principalmente door di un subida di 12.1% den e categoria “Aparato pa uso domestico”, causando un efecto di 0.28 ppt. E subida den e sector di “Vivienda” a worde causa principalmente door di un subida den e categoria “Mantencion y reparacion di vivienda” (4.6%), causando un efecto di 0.24 ppt.
E caida den e sector di “Recreaccion y cultura” a worde causa door di principalmente un caida den e categoria “Vacacion” (-14.8%), causando un efecto di -0.44 ppt. E caida den e sector di “Paña y sapato” a worde causa principalmente door di un caida di 9.8% den e categoria “Paña”, causando un efecto di -0.19 ppt.
Canasta di consumo: E canasta di consumo di e CPI ta consisti di 408 bienes y servicionan. Compara cu December 2022, 57.4% di e bienes y servicionan aki a conoce un aumento di prijs causando un efecto di 1.88 ppt, mientras cu 32.6% ta mustra un caida di prijs, cu a contribui cu un efecto di -1.58 ppt y pa e restante 10.0% no tabata tin cambio den prijs.
Prijsnan di bienes a subi cu 0.4% y a causa un efecto di 0.25 ppt. Prijsnan di servicionan a conoce un subida di 0.1% y a causa un efecto di 0.05 ppt riba CPI di Januari 2023.
Core inflation: Segun CBS a raporta, e asina yama CPIC (core inflation) (CPI excluyendo e efecto di energia y cuminda) a registra na Januari 2023 un subida di 3.1%. E indice di energia - cu ta consisti di e productonan: electricidad, awa, gasolin y diesel a registra un subida di 15.1%. E indice di cuminda a registra un subida di 11.1%.
Bestaansminimum: E bestaansminimum pa un hogar consistiendo di 2 adulto y dos mucha (edad 0-15 aña) na Januari 2023 ta Afl. 5.363.
Esaki ta un caida di 13 Florin compara cu December 2022 (Afl. 5.376).
E bestaansminimum pa un hogar di un 1 adulto ta Afl. 2,554, un caida di 6 Florin compara cu December 2022 (Afl. 2,560).
