ORANJESTAD(AAN)- “Si na e momentonan aki legalmente e Ley di Screening ta stroba Benny y Alan di bira Ministro, esaki ta nifica cu hamas nan por drenta Parlamento di Aruba segun e leynan di moral di Aruba y di e Arubiano.”
Esaki ta palabranan di expertonan constitucional cu DIARIO a consulta den loke a bira un desaroyo sumamente tristo den e panorama politico di Aruba.
Expertonan constitucional ta basa nan mes riba e intencion di legislacion ora a institui e forma cu Aruba ta wordo goberna.
Na un forma absoluto, Aruba ta wordo goberna a base di un sistema, cu mester sigura cu na tur momento, tur aspecto cu ta stroba e buskeda di e bienestar di Aruba a base di leynan di moral y di consenshi di Aruba, ta wordo gescrap legalmente.
E Trias Politica ta e sistema cu na un pais democratico ta evita dictura, pues cu un solo ta manda y asina ta impone tiponan di gobernacion cu ta destrui e caracter di un Pais y si un Pueblo.
Segun informantenan na momento cu personanan cu ta sospechoso den casonan penal na Aruba, wordo permiti pa pone nan mes candidato pa Parlamento di Aruba, e pais ta acepta responsabilidad pa loke por pasa si resulta cu nan a comete actonan cu ta contra leynan di e pais.
Aruba ta un Estado di Derecho cu tin su fundeshi den leynan cu ta refleha e moral y consenshi di un pais.
Na e momentonan aki no ta a base di rumor pero a base di loke autoridad penal mester por presenta na Hues den un caso den Corte, ta considera Benny Sevinger y Alan Howell sospechoso di actonan penal.
Den mas articulo di awe, DIARIO lo mustra con un investigacion ta tuma luga y kico ta pasa prome cu autoridad menciona nomber di personanan cu den su concepto ta wordo sospecha di a actua contra leynan di e pais.
Pa Ministerio Publico acepta cu e ta cuminsa cu un investigacion, e mester tin prueba den su man cu tin indicacion di actonan cu ta contra ley. Si Ministerio Publico no por haci esaki, for di e prome momento un abogado por actua y sigur Hues Comisario lo no permiti pa e sospechoso wordo mancha durante e proceso di investigacion oficial.
“Pa papia di sospechoso, mester tin bon indicacion a base di investigacion profundo y declaracion di testigonan,” a wordo trece dilanti.
Informantenan experto a mustra con den e caso aki, autoridad no a detene Benny Sevinger como prome sospechoso pero claramente ta sigui un caminda cu ta acumula evidencia pa medio di material (investigacion di material cu a confisca pa haya prueba) pero tambe interogatorio di otro sospechosonan.
Manera DIARIO lo trece dilanti den e edicion aki, dos di e tres acusadonan ya a yega e nivel di “voorlopige hechtenis” a base di decision di Hues Comisario.
Den e cuadro aki ni Benny Sevinger ni Alan Howell por pone nan mes candidato pa bay representa e Arubiano of Aruba, cu segun e propio codigo penal di e pais, no ta di acuerdo cu e actuacion di personanan cu por wordo persigui pa nan conducta.
Expertonan ta mustra cu corectamente un Gobierno mester a bay cas pa motibo di investigacion di Alan Howell y cu no ta aceptabel pa awe e ta dirigi un lista di candidato pa e por bolbe Parlamento.
Tampoco ta aceptabel cu e sistema di husticia na Aruba ta wordo mancha cu palabranan di e lider di AVP, Mike Eman, cu ta un hurista cu conoce ley y e motibo pa e leynan a existi.
“Si tin Trias Politico no ta solamente pa evita cu ta abusa di placa di Pueblo pero sigur pa sigura cu Parlamento por controla e bon conducta di un Conseho di Ministro. Si Miembronan di Parlamento mes ta sospechoso hamas nan por controla Gobierno y hamas nan por sostene e Leynan cu Husticia ta defende y proteha,” expertonan a splica.
