Señora Kar-Lie Angelina, directora di Verius Business Solutions:
ORANJESTAD (AAN) Matutino DIARIO a entrevista Kar-Lie Angelina, director di Verius Business Solutions, cual negoshi ta draai a base di asuntonan cu tin di haber cu temanan di belasting, negoshi, hendenan cu ta cuminza cu negoshi, of cu ya ta den negoshi pero no sa con pa maneha nan administracion diario, nan belasting, sea pa persona individual of companianan, y casonan un tiki mas complica di belasting.
Ademas di yuda hende soluciona asuntonan di belasting of guia nan den ki caminda mester cana, e tin e meta di educa e comunidad riba tematica di belasting, kico ta nan derechonan y nan debernan, cu hopi biaha esaki tambe ta importante.
“Un parti di nos meta ta yuda concientiza e hendenan, kico e cartanan cu nan ta haya ta, con nan tin cu deal cu nan, kico ta nan derecho, por ehemplo si nan no ta di acuerdo cu ne, nan tin cu haci un obhecion dentro di dos luna, si en caso, por ehemplo, cu no a entrega nan aangifte na tempo, y cosnan asina ey. Kiermen, no necesariamente pasobra mi a haya e papel mi tin cu pag’e. No, bo ta sinta analiza e situacion tambe, si e ta algo cu e tin cu paga of no, e ta algo a base di mi entrada real, of no?” señora Kar-Lie a señala.
El a comenta cu hopi hende ta kere cu ora nan haya e papel nan tin cu core paga, of cu nan a bis’e cu paga e tin cu paga, y e mal comunicacion cu tin of keda sin duna informacion, of no dun’e completo, eigenlijk no ta bon. “Anto p’esey nos kier guia y kita un poco e miedo ey cu tin di e tematica”, el a subraya.
