Directora di DIMP, Luenne Gomes-Pieters:
ORANJESTAD (AAN ) – Luenne Gomes-Pieters, directora di Departamento di Impuesto, den su entrevista cu DIARIO a expresa cu BBO ta genera mas di 300 miyon florin pa aña, cu ta un di e 'drivers' di entrada di gobierno.
“Pues, nos ta papia di un minimo di 14% caba. “Si bo wak otro paisnan y loke IMF ta recomenda, e ta recomenda un tarifa. Esey kiermen cu e efecto inflacionario riba productonan di consumo ta bay ta haltisimo, y esun ta un di e motibonan pakico gobierno e tempo ey a bisa cu nan ta parkeer e BBO pasobra e efecto inflacionario riba productonan di prome necesidad ta bay ta hopi grandi”, Gomes-Pieters a bisa.
El a agrega cu e tempo ey, na 2022, tabata tin tambe e inflacion importa cu mester a deal cu ne.
“Paisnan tabata sali for di pandemia y por a wak cu prijsnan rond mundo tabata tin un inflacion hopi grandi, unda cu nos tambe ta importa e productonan eynan cu e prijsnan un tiki mas halto cu normal. Pues, e efecto inflacionario ta importante pa nos tene cuenta cu ne. E tarifa tabata un punto di discusion, y tambe cu comercio a menciona cu e prijs cu ta inclui e BBO di 7% (6% e tempo eynan, cu nan no ta bay back na dje. Pues, si mi tin un producto di 100 florin cu tin un 7% di BBO awo den dje, si nos ta papia di 14% e ta bay bira 21% pasobra 7% ta keda den e prijs di producto y ta añadi e 14% di BTW si acaso esey ta e punto, y bo ta haya bo cu un BTW di 21%. Pues, no ta un cuestion di ‘nos kier un btw’ of ‘nos tin cu bay cu btw’.
Un BTW sistema ta un sistema di cobranza di impuesto indirecto, pa bo garantiza cu e ta bay duna bo e mesun entrada cu BBO ta genera. Tin diferente aspecto cu ta importante; e aspecto inflacionario riba productonan di consumo ta sumamente importante, si bo no kier crea pobreza den bo poblacion”, Gomes-Pieters a bisa.
Gomes-Pieters a menciona cu DIMP a propone e tempo eynan pa traha cu dos tarifa; dus mantene e tarifa di 6% pa productonan di consumo, y 14% pa productonan di servicio y productonan cu no ta di consumo, pero IMF y gremionan no a bay di acuerdo cu ne, y e discusion aki no ta bay cambia.
Un di dos punto cu e directora di DIMP ta haya importante, ora di papia di un sistema BTW, ta cu ora nan delibera y papia di BBO na frontera, comerciantenan ta bisa cu e ta corta den nan cash flow, pasobra ora nan mester paga na frontera e tin cu paga na frontera aunke e no a bende su producto ainda.
