Directora di DIMP Luenne Gomes-Pieters:
ORANJESTAD (AAN) – Directora di Departamento di Impuesto (DIMP), señora Luenne Gomes-Pieters, den conferencia di prensa yama pa Minister di Finanzas, a amplia mas tocante e sistema di BBO na frontera.
Gomes-Pieters a señala cu un sistema di BBO na frontera ta traha casi mescos cu un sistema di BTW, cu tambe conoce un sistema di “teruggave beschikking” (restitucion), indicando cu si gobierno tabata den linea pa introduci un BTW lo mester a tuma elementonan esencial na un sistema di BTW y implementa esakinan. El a reitera cu individuo y comerciantenan ta bay paga BBO na frontera, y momento cu un comerciante ta paga e impuesto aki, esaki lo keda registra den e sistema di Azycuda.
Director di DIMP a bisa cu pa basta aña nan tin un sistema automatiza, cu nan a bin ta usando no solamente pa belasting y BBO pero tambe procesonan di aanmaning y restitucion ta acopla na e sistema di Azycuda. Pues, na momento cu un comerciante ta paga 20 florin na frontera, por ehemplo, y a base di su volumen di benta e tin cu paga 10 na BBO, e ta yena su formulario den “bo impuesto portal” y naturalmente, e tin cu paga 20 na frontera y 10 segun su volumen di benta, pues e tin un restitucion di 10 pa haya.
Esaki ta wordo procesa di biaha door di e sistema cu ta duna un “teruggave beschikking”. E 'beschikking' aki ta un formalizacion cu ta bisa formalmente cu e persona tin derecho riba restitucion y esaki ta bay cana automaticamente den DIMP su sistema.
“Pues no ta asina cu ta bay dura añanan pa e restitucion, ni cu DIMP ta bay wanta e restitucion, ni cu Departamento di Impuesto no a inverti den e sistemanan digital, tecnologianan avanza pa por acopla un sistema di BBO na frontera y BTW den futuro. DIMP tambe tin su inversionnan, su trabaonan y su expertonan tambe tras di lomba y pronto tambe comercio lo bay mira esaki. Nos lo invita nan na un di dos tanda conhuntamente cu Departamento di Aduana, y nan lo bay mira con e sistema lo traha den practica”, Luenne Gomes-Pieters a señala.
