ORANJESTAD (AAN): Cifranan di Oficina di Estadistica ta mustra cu e indice di “Cuminda & servicio di catering” a registra un subida di 0.6% na Maart 2022, despues di un subida di 0.8% na Februari 2022.
E indice di “Cuminda na cas” (0.7%) a registra un subida, unda nuebe (9) di e diesun (11) indicenan di e gruponan di cuminda na cas a subi na Maart 2022.
E indice di “Batata, yuca y batata dushi” a conoce e subida di mas grandi (6.3%) na Maart 2022. Otro subidanan significante a wordo registra den e indicenan di “Carni” (1.6%), “Azeta y otro productonan traha di vet” (1.5%), “Restante productonan pa alimentacion” (0.9%), “Pan y otro productonan di grano” (0.7%) y “Bebida no-alcoholico” (0.5%).
E indicenan di “Berdura” (-1.6%) y “Fruta” (-0.6%) a registra e unico caidanan na Maart 2022.
Den e ultimo diesdos (12) lunanan e indice di “Cuminda & servicio di catering” a subi cu 6.5%. E indice di “Cuminda na cas” a conoce un subida di 7.2%, unda tur e diesun (11) indicenan di e gruponan di cuminda na cas a subi durante e ultimo aña. E indice di “Azeta y otro productonan traha di vet” a subi cu 20.3%, e subida di mas grandi entre e gruponan di cuminda na cas. Otro subidanan significante a wordo registra den e indicenan di “Fruta” (12.4%), “Batata, yuca y batata dushi” (11.0%) y “Carni” (10.0%).
E indice di “Cuminda pafo di cas” a subi cu 0.3% na Maart 2022 y a registra un subida di 5.0% den e ultimo diesdos (12) lunanan.
Na Maart 2022, “Cuminda na cas” y “Cuminda pafo di cas” como grupo, tawata tin un subida di prijs di 0.6% compara cu Februari 2022 y hunto tawata tin un influencia di 0.09 ppt riba e CPI, mientras cu e restante bienes y servicio hunto a experencia un subida di prijs di 1.1% y tawata tin un efecto di 0.94 ppt riba e CPI.
