Segun Jayburtt Dijkhoff di Fundacion SIKI:
ORANJESTAD (AAN): Den un conferencia di prensa diabierna ultimo, hunto cu señor Ricardo Croes, señor Jayburtt Dijkhoff di Fundacion SIKI, a duna un resumen di e situacion medico di yiu di e ex-parlamentario Ricardo Croes y e posicion cu AZV a tuma den e caso di e hoben aki.
A keda constata cu e hoben tin cancer na un organo y ta wordo manda Colombia pa AZV pa haci un operacion pa saca e organo. Mientras e ta na Colombia, a haci peticion na AZV pa en bes di e operacion y kita e organo afo, y pa scapa e organo pa su calidad di bida, por haci immune terapia. El a splica cu e tratamento aki ta algo cientificamente aproba rond di mundo na unda ta duna e terapia specifico segun e tipo di cancer.
Segun señor Dijkhoff, despues di dos siman, nan a haya contesta di AZV cu e hoben a wordo manda pa haci un operacion pa kita e organo y no pa un immune terapia y si no haci loke AZV bisa, nan por regresa Aruba e siguiente dia. Segun e, AZV ta na haltura cu si e hoben regresa Aruba, e posibilidadnan pa e pashent haya sa ki tipo di cancer e tin y haya operacion di un ciruhano cu por haci e tipo di operacion ey ta practicamente nulo. Segun e, AZV basicamente ta condena e hoben na un morto prematuro.
El a splica cu e tipo di cancer aki sin e terapia menciona, e sobrevivencia ta un aña, siendo un cancer agresivo cu ta crece rapido, y segun e, AZV sa esaki. Y cada dia ta bira un dia mas peligroso pa e desaroyo pa e salud di e hoben.
El a remarca cu un biaha mas burocracia, falta di comunicacion y mas cu tur, falta di transparencia ta hunga un rol den e storia aki. “Falta di transparencia ta cuminda pa mal comunicacion, pa erornan, pa daño pa pashent y hopi biaha tambe ta cuminda pa abuso di poder y corupcion”, el a enfatisa.
Segun e, aunke cu ley ta bisa cu ta entre doctor/specialista y pashent ta yega na un acuerdo pa tratamento, nos leynan ta bisa cu ta e pashent mester dicidi a base di un ‘informed consent’, pero den realidad ta lo contrario. Y hopi biaha ta pusha e pashentnan na cierto tratamento y despues specialistanan y AZV ta punta dede riba otro.
Señor Dijkhoff a enfatisa cu Fundacion SIKI ta para pa tur pashent na Aruba y ta haci un apelacion na AZV pa papia cu e famia. Pa wak kico por haci ainda pa scapa bida di un hoben. Con por yuda e dolor di un hoben den e margin cu e ley si ta duna pa e ta ‘fair’ pa e hoben. “A yega e momento pa nos recapacita, wak den nos mesun cas y duna un famia e oportunidad pa scapa bida di nan ser stima”, Señor Dijkhoff a enfatisa.
