Psikiatra Nathalie Kingsale:
*Awo tin entre 300 pa 400 den terapia
*Ta calcula eyfo tin como 500 sin busca tratamento
ORANJESTAD (AAN) – E Psikiatra dokter Nathalie Kingsale, ya finalizando su entrevista cu DIARIO a comenta, den cuadro di salud mental na Aruba, cu tin hende cu ta skirbi riba facebook, cu nan mester ayudo, cu nan no sa kico pa haci…y el a reitera y subraya cu e caminda pa cana ta bay cerca nan dokter di cas, cu ta esun cu ta wak con compleho e problema ta.
“Hopi hende ta experiencia nan problema como hopi pisa y compleho. Pero e dokter di cas por haci e diferencia: wak si esaki ta pa Respaldo of e ta un problema cu por wordo yuda di un otro manera mas leve, manda e persona ey na Hunto of tin biaha na Departamento di Asunto Social, pasobra nan tambe tin psicologo”, dokter Kingsale a splica.
E specialista a agrega cu si un persona ta den crisis, su famia por trece Hospital, na emergencia, na unda e ta wordo atendi pa psikiatra, y na e momento ey ta wak si e ta drenta behandeling, pero pa e crisis so.
“Pasobra pa nos, Emergencia por wak si e crisis ta algo severo cu mester ayudo mesora, of no. E ora ey nan ta yama nos”, Kingsale a bisa.
Kingsale a indica tambe cu aworaki Respaldo a cuminza cu e sistema EPD (Electronic Pashent Dossier) y poco, poco nan ta hayando cifra.
“E fastioso ta cu nunca nos tabata tin suficiente cifra. E datanan pa wak cuanto hende cu depresion nos tin, cuanto hende cu a suicida, cuanto pashent ta psicotico, pues poco, poco nos ta haya mas cifra. Nos tin idea cu ta parce si, cifranan internacional, pero si nos wak Psicosis, schizophrenia, si wak e cifranan internacional, Aruba ta suppose di tin 1200 pashent schizofrenico”, Dr. Nathalie Kingsale a señala.
El a agrega cu aworaki Repaldo tin entre 300 pa 400 pashent den terapia y ta calcula cu tin como 500 eyfo cu no ta buscando ayudo ainda.
