ORANJESTAD (AAN): Diasabra ultimo Wardacosta a ricibi un notification di Wardacosta di Venezuela, cu un boto tabatin problema cu su motor.
E boto tabata drif riba laman den e area di responsabilidad di Wardacosta Caribe Hulandes y e tres ocupantenan di e boto tabatin necesidad di yudansa agudo.
Centro di Operacion Maritimo di Wardacosta despues di e notificacion, a pidi asistencia di e avion Dash. Una bes cu e avion a yega na e localidad e tripulacion di e avion patruyero a nota e boto den necesidad.
E avion patruyero a bula den bisindario di e boto en busca di un barco òf boto cu lo por duna yudansa na e ocupantenan di e boto den necesidad. Den bisindario e avion Dash a nota un barco di bela cu cuater mast, cu e nomber Star Clipper y a pidi esaki pa duna asistencia na e boto cu tabata drif cu su ocupantenan riba dje. E barco di bela Star Clipper a tuma e ocupantenan den necesidad na bordo y a hiba esakinan Colombia, caminda autoridadnan aya a tuma cargo di nan.
