Parlamentario Arthur Vallejo: - *E instituto aki mester keda independiente
ORANJESTAD (AAN) — Parlamentario Arthur Vallejo, den conferencia di prensa tocante e tema AruBIG, el a señala cu nan ta wak e proceso aki full, con e ta cana y tambe e anexo cu a wordo introduci, cu ta e Instituto di Calidad, cu ta dos cos diferente.
Vallejo a splica cu un cos ta e ampliacion di e reconocemento di e Organonan di Acreditacion, cu a wordo logra pa inclui nos yiunan di tera y otro cos ta e anexo cu a wordo traha den Ley cu ta e instalacion di e Instituto di Calidad.
El a agrega cu esaki ta hopi importante, pasobra for di inicio nos kier a habri espacio pa nos yiunan di tera, pero semper teniendo na cuenta e calidad di e estudio tambe.
Vallejo a señala cu e tarea cu e Instituto di Calidad tin ta pa evalua diploma, evalua antecedentenan medico di parti di abogadonan cosnan importante cu kizas den pasado, di e profesional aki, pero tambe mester corda pa evalua e peso academico ora di nan estudio, y diferente otro punto cu ta importante tambe pa por realiza calidad.
“Parti di esaki tambe ta, cu e profesional mester bay sigui diferente regla y normanan internacional, pa cu e scol continuo: e continuidad di estudio y e diferente congresonan y organonan cu por asisti na dje pa gana creditonan ora, pasobra mester sigui cu un cierto interes, escolaridad, diploma, educacion continuo den bo carera. No cu bo ta yega, bo ta traha, bo ta lubida e resto y bo no ta keda up to date cu bo temanan, pero constantemente mester tin oranan di estudio pa aña. Mester prepara esey, pues ta hopi importante pa bo ta up to date den e temanan medico, dentista, boticario, etc. E ta importante pa tur hende ta up to date cu tur e temanan di salud”, Parlamentario Arthur Vallejo a indica.
Vallejo a splica cu den e Instituto di calidad tambe ta pasa un parti di inspeccion, cu ta hopi importante. Otro punto cu ta cardinal ta, y e parlamentario tin un pensamento profundo riba esey, cu e Instituto di Calidad aki mester ta riba su mes.
“E Instituto mester ta independiente di e minister, directornan di departamento, y di cualkier conflicto di interes cu por tin; y esaki ta algo cu seguramente nos mester traha riba dje, pa e Instituto di Calidad ta independiente den termino corto pa evita cosnan cu nos sa cu ta pasa na Aruba, por ehemplo, tin personanan cu ta scoge cu e candidato aki si por drenta of e candidato aki no por drenta; diferente cos cu nos ta nota y experiencia y cu mi a biba aden; mi a bib'e den carni propio” e parlamentario a señala. Tin cosnan cu, finalmente, full e esfuerzo cu nos a haci akinan di parti di AruBIG, por cay den un organo independiente, cu ta supremamente importante pa nos por traha, pa nos por logra ora e keda instaura, pa e por haci su trabao trankilamente”, Parlamentario Arthur Vallejo a remarca.
