Director di RBC Royal Aruba NV, Pierre Rafini:
*Y ningun banco local por traha sin intermediario
*Nan tin un vergrootglas masha grandi mes riba Caribe
ORANJESTAD (AAN) – Un pregunta cu banconan local ta haya, frecuentemente, ta di con nan no ta enfoca pa yuda pa Cannabis Medicinal bira un pilar economico pa Aruba.
Den entrevista cu director di RBC Royal Bank Aruba N.V, señor Pierre Rafini, den cual DIARIO a haci tambe e pregunta aki, y el a bisa cu esaki ta pasobra tur banco local ta traha cu un banco intermediario, cu ta los di cualkier afiliacion cu cualkier di e banconan local.
“Nos mester tambe di e banconan intermediario aki pa efectua transferencianan internacional; nos ta depende di casi 100% ya cu nos ta importa casi tur cos, pues pa bo paga pa bo importacion bo mester manda placa afo, y e banconan aki ta facilita e pagonan pa nos. Dus, e banconan intermediario akinan ta esnan cu ta hacie hopi dificil pa nos, como banco, por haci negoshi cu Cannabis. M I ta kere cu e parti di complies ta hunga un rol hopi grandi pa nan, e tin ‘money laundry’, y esey ta locual ta stroba mayoria di banco local cuminza explora of habri cuenta pa companianan of comerciantenan, cu kier cuminza e negoshi di Cannabis”, señor Rafini a duna di conoce.
El a reitera cu, naturalmente, ningun banco local por traha sin intermediario, pasobra si mañan un banco intermediario ta bisa cu e ta cera su cuenta pa esun local, como banco e ta den un problema grandi pasobra ningun di su clientenan e por ofrece e facilidad di haci pagonan internacional, cu consecuencia cu e banco ta perde su clientenan, y na final di dia, probablemente hasta mester cera bo banco.
“Diferente pais ta hacie pero si wak bon, bo ta ripara cu den Caribe ningun pais ainda ningun di nan a cuminza hacie pasobra tin un vergrootglas masha grandi mes, riba e region Caribe. Por ta, nos ta sinti cu tin banconan grandi ta pensa den area di Caribe como un area di riesgo halto, mirando cu nos ta hopi cerca di paisnan di Latinoamerica, cu por ta anteriormente, tabata conoci pa negoshi ilicito, of di droga, y nos tur den Caribe nos ta rondona di awa, nan ta pensa cu podise cu boto traficacionnan ta tuma lugar y cu placa di esey ta wordo uza pa cierto tipo di negoshinan y asina ta wordo infiltra den mercado”, Pierre Rafini a señala.
El a agrega cu banconan intermediario tin un escepticismo, si por yame asina, over di Caribe, cual nan regulacionnan pa banconan den Caribe, ta hopi mas severo y streng en comparacion cu otro paisnan grandi den e region.
