Consumidornan a bira mas pesimista den prome trimester di 2023
ORANJESTAD (AAN): E siman aki, Banco Central a emiti resultado pa e di prome trimester di 2023.
Den un solo palabra: “Consumidor tabata mas pesimista”. Segun Banco, esey ta nan conclusion mirando cu e indice di confianza di consumidor a cay cu 1,2 punto di indice te na 93,0 den e di prome trimester di 2023 (Grafico 1).
Na final di e di prome trimester, consumidor tabata principalmente preocupa cu (i) e situation di negoshinan y di economia lo deteriora (Q1-2023: 51 porciento, Q4-2022: 54 porciento), (ii) tin dificultad pa haya un trabao nobo (Q1-2023:44 porciento, Q4-2022: 38 porciento), y (iii) e posicion financiero di gobierno lo empeora (Q1-2023: 43 porciento, Q4-2022: 35 porciento). Ademas 33 porciento di tur respondente ta anticipa cu e situacion financiero na cas lo empeora den e di prome trimester di 2023, esta 15 punto di porcentahe menos compara cu e trimester anterior (Q4-2022: 45 porciento). Aproximadamente 91 porciento di tur respondente a señala cu nan ta premira cu prijsnan lo ta mas halto den e proximo 6 lunanan (Q4-2022: 92 porciento).
Tanto e indice di e situacion actual como e indice di expectativa a baha, esta cu 0,8 punto di indice te na 93,4 y 0,1 punto di indice te na 93,9, respectivamente, den e di prome trimester di 2023.
E cantidad di respondente cu a raporta cu baymento di vakantie no tabata conveniente, a subi te na 57 porciento (Q4-2022: 36 porciento), mientras 56 porciento di e respondente a señala cu compra di un aparato grandi no ta adecua (Q4-2022: 41 porciento). Pa locual ta haci un prestamo, 68 porciento di respondente a indica cu esaki no tabata adecua (Q4-2022: 60 porciento). Ademas 65 porciento di respondente a raporta cu tuma un hipoteca no tabata adecua (Q4-2022: 58 porciento), mientras cu 73 porciento di respondente a señala cu compra di un auto no tabata conveniente (Q4-2022: 65 porciento). Consecuentemente, e indice di habito di consumidor a baha di 95,1 den e di cuater trimester di 2022 te na 92,5 den e di prome trimester di 2023.
