Premier Wever-Croes:
ORANJESTAD (AAN): E temporada di Carnaval pa e aña aki ta cuminsa cu su prome evento diasabra anochi 6 di januari. Carnaval ta e celebracion cultural di mas grandi di Aruba na unda cu expresionnan di fantasia y color ta haya bida den varios evento. E creatividad di nos hendenan carnavalesco ta e refleho di e Arubiano cu ta stima y cuida su cultura. E aña aki Aruba ta celebra Carnaval 70 y tur cos ta mustra cu e lo bay ta grandi y bunita. Exito di un Carnaval, ta e cooperacion di disciplina y ordo cu organisadonan, participantenan, autoridadnan, organisacionnan di cuido y cada ciudadano carnavalesco ta pone den e temporada aki.
Prome Minister Evelyn Wever-Croes, den nomber di Gobierno di Aruba ta desea pueblo di Aruba un dushi temporada di Carnaval. Prome Minister ta encurasha tur pa celebra Carnaval na un manera hopi responsabel y pa tur hende goza sanamente y cu midi.
“Mi ta encurasha tur hende pa celebra nos Carnaval cu entusiasmo pero pa semper duna prioridad na siguridad y respet pa otro. Laga nos cuida nos muchanan, no expone nan na mucho solo y zonido fuerte, tampoco na oranan mucho laat di anochi. Duna nan suficiente di come y hopi awa. Laga nos comporta nos mes na un forma civico pa asina tur hende por celebra nos Carnaval y mustra mundo henter cu Aruba si sa con ta celebra Carnaval. Feliz Carnaval Aruba”, Prome Minister a expresa.
Prome Minister ta gradici tur esnan cu ta engrandece nos Carnaval. Organisadornan, Participantenan, Lidernan di Grupo, Bandanan Musical. Tur esnan cu ta traha pa haci nos Carnaval sigur, cuerpo policial, ambulance, Rode Kruis, DOW, Serlimar entre otro. Danki na boso tur cu ta haci e temporada aki bunita, festivo, sigur, cu disciplina y ordo.
