Señora Shalinie Flores, coordinadora:
ORANJESTAD (AAN) — Shalinie Flores, Coordinadora di Centro di Bario Lago Heights, den entrevista cu DIARIO a duna di conoce cu su funcion ta pa trece programanan, informacion, y brinda e publico loke nan ta desea.
Señora Flores a señala cu ultimo añanan a mira un caida den centronan di bario, y su funcion e ora ey ta pa diseña y traha e proyectonan pa trece e comunidad bek, di diferente edad, diferente pasion, y interes, pa acerca nan bek na e Centro di Bario Lago Heights pa por recrea, siña, ta hunto y socializa pa asina trece bida bek den e Centro.
Asina, un evento grandi y bunita manera “Ban Caya” a tuma lugar den Centro Lago Heights cu un apoyo masal di e comunidad, tanto adulto como hoben y mucha.
Nan a haya informacion door di diferente instancia, a participa cu varios actividad, specialmente di e muchanan cu tabata hopi bunita pa mira. Kiermen, e interes tey y loke kizas mester haci ta brinda mas di e oportunidadnan aki, segun señora Flores.
Flores a subraya cu Distrito di San Nicolas ta completamente cla pa sigui riba e ruta aki. E ta corda tempo di Sanifest, cu a tuma lugar hopi tempo pasa, Centro di Bario tabata cumpli tur siman, tur Diabierna, y definitivamente e ta kere cu ta hopi necesario pa e muchanan por haya e ofertanan aki, pa bin riba caya bin hunga un rato y di banda di Centro di Bario nan ta dispuesto pa ofrece much mas na e muchanan.
