E ta e ‘tata’ di Intelcentrum y Teleshops
ORANJESTAD (AAN): Diahuebs siman pasa a drenta e tristo noticia, cu ing. Hermand Richardson, mihor conoci como ‘Baba’ a fayece.
Como un persona cu educacion den mundo tecnico, Baba Richardson ta conoci pa hopi hende keto bay como Director di Setar na final di decada di 1980.
Baba tabata wordo considera como un di e top-ambtenaar di Gobierno e tempo ey. Esey tabata e epoca cu ainda no tabatin celular na Aruba, pero momento cu Setar tabata creciendo den su cantidad di abono, y tambe peticion pa extra liña di telefon debi cu e uso di Fax-Machine a bira inmensamente popular.
Baba Richardson ta wordo considera e homber principal pa a bin cu Intelcentrum, hunto cu e gigantesco antenna di satelite na Sero Blanco cu a pusha Setar mehora substancialmente e calidad di yamadanan internacional, y suministro di data pa negoshinan. Na December 1988 ora cu e centro aki a wordo inaugura, e tabata ser considera como e Tata di e Proyecto aki, cu a bira esun di mas grandi cu e compania a realiza. E tempo ey Baba Richardson tabata fungi como Director Tecnico.
Tambe Baba Richardson ta esun cu a pusha pa Setar cuminsa crea e servicio di ‘Teleshops’, cualnan keto bay ta existi 35 aña despues.
El a keda funciona na Setar te ora cu na September 1990 el a pidi su retiro. Di e forma ey Gobierno a perde e top funcionario aki cu a presta inmensamente bon trabao. E tempo ey a wordo bisa den prensa, cu el a pidi retiro debi na un supuesto clash cu el a haya cu e Ministro di Telecomunicacion, Sr. Nicolaas di PPA, e tempo aya. Baba Richardson a tuma honor pa su mes y a baha di e puesto, y a keda insisti cu e clash no tin nada di haber. Pero pueblo tabata sinti ainda con un poco tempo prome, un otro top-funcionario den Gobierno, esta Michael Nicolaas (Director di Aeropuerto) tambe a retira despues di clash.
Baba Richardson tabatin hopi admiracion pa su trabao, no solamente na Aruba, pero tambe cerca expertonan tecnico na Hulanda, nan tabatin hopi aprecio pa su trabao y su forma di maneha Setar.
Despues di a bandona Setar, Baba Richardson como un aña despues a habri su mesun compania, esta Indel Aruba NV na Maart 1991. Nan tabata representa ekiponan di two-way radio di marca General Electric. E tempo ey e uso di wireless radio tabata importante pa companianan, y e compania a enfoca riba bendemento di e radionan aki, y instalacion di wayanan di data tambe pa negoshinan, sistema UPS di coriente, y PABX pa companianan grandi.
Ademas di Setar, Baba Richardson tabata activo tambe den mundo deportivo, e.o. den comision di SV Bubali den decada di 1980 y 1990, y tabata envolvi den e plannan pa por a construi e Clubgebouw cu tin actualmente ainda. E mes tabata un coredor di distancia largo, y tabata participa den Triathlon.
Den parti social, e tabata activo tambe den Verkennerij, y tabata miembro di Raad di Verkennerij VAP.
Hermand Leonard Richardson a nace na Aruba dia 9 di April 1948, pues tin 76 aña di edad. DIARIO ta expresa su mas profundo palabra di condolencia na famia y amigonan.
