Solange Tchong, PR di AZV:
ORANJESTAD (AAN) Solange Tchong, Relacionista Publico di AZV, den entrevista cu DIARIO a ratifica cu na Aruba tin scarcedad di docternan di cas, pero en general, di profesionalnan medico.
Tchong a yega di splica for di pasado y awo ta reitera cu tin specialistanan cu ta dificil pa haya, of en todo caso, pa bin traha na Aruba.
El a agrega cu AZV tin den planning pa 2024 sigui cu e sistema di cas di docter. “Nos ta kere cu esaki ta algo hopi bon, cu nos tin cu sigui traha riba dje, y e idea ta pa bin cu algun cas di docter nobo, y nos ta trahando pa esaki caba pa wak si e por keda concretiza den 2024. E idea ta pa bin cu un cas di docter na San Nicolas, y si por nos lo ta pensa den e area di, por ehemplo, Paradera. Pa asina sigui duna e servicio di docter di cas mas cerca tambe di e aseguradonan”, Solange Tchong a señala y a agrega cu e ta keda un reto sigur pa AZV, pero nan ta sigui busca e profesionalnan medico cu nos comunidad mester.
El a comenta tambe cu AZV tin cu wak e hendenan cu ta den e opleiding di specializacion di docter di cas caba, y esaki ta algo cu ta bay sigui. “T’a asina tambe cu AZV tabata tin un reunion orientativo cu algun studiante di Costa Rica, pa bisa kico AZV por ofrece y tambe pa wak si tin interes pa trece studiantenan den e area di por ehemplo, Colombia y Costa Rica, pa bin bek Aruba, pa traha. E ta keda un reto pero nos a logra den varios situacion pa haya ayudo, y nos ta sigui busca, sigur cu si”, Solange Tchong a señala.
El a sigui bisa cu AZV tambe ta wak un desaroyo cerca e docternan di cas y nan ta bisa cu nan mes ta sinti pa bay na un formula diferente.
“Kiermen e idea di diferente docter bao di un dak ta algo cu nan ta hayando mas y mas atractivo, pasobra por wak cu e docternan mes kier traha den un grupo, cu traha nan so den un practica. Esaki ta un deseo cu a wordo expresa y pesey mes AZV a bisa ok, nos tambe ta braza e idea aki y lo sigui cuminzando na pensa riba un cas di docter nobo, di cual nos ta pensa den e area di San Nicolas, y posiblemente, otro lo ta den e region di Paradera”, Solange Tchong, Relacionista Publico di AZV a reitera.
