Solange Tchong, Vocero:
ORANJESTAD (AAN): Vocero di AZV, Solange Tchong a indica cu e destaho publico pa loke ta e hospitalnan di Colombia ta bay dura su tempo. E lo dura entre 6 pa 8 luna. Ta calcula cu pa fin di Juni 2023 ta bay keda cla cu e destaho aki.
Tchong a agrega cu esaki ta nifica cu lo tin contratonan nobo entrante 1 di Juli 2023.
Pa loke ta 2023, AZV a caba di inicia cu reunionnan informativo y di orientacion pa e laboratorionan tambe cu e pensamento di kisas bay over na un sistema nobo relaciona cu e tarifanan.
AZV ta bezig cu e grupo aki tambe, a remarca.
Un di e cosnan cu sigur AZV kier haci pa 2023 ta baha loke ta e tempo di espera cerca specialistanan. Principalmente cierto specialistanan unda ta conoci cu tin e problema y cu esaki a acumula.
No mester lubida cu durante di aña 2020, a bay den 'lockdown' y diferente sector mester a stop di funciona of no por a funciona optimalmente pasobra mester a dedica tur e atencion na e pashentnan di Covid. Esaki a causa un retraso extra ariba e tempo di espera caba, Tchong a indica.
Dos aña despues, cu ya caba den varios specialismo a yuda pashentnan y ta saliendo for di e lista di espera, pero tin cierto areanan cu ainda tin e reto aki.
Un di e retonan ta por ehempel Retinologia, ora cu tin complicacionnan di wowo y e retina mester wordo opera. Eynan tin un tempo di espera toch cu ta wak cu ta mas di e 4 lunanan cu ta e promedio di e normal.
Tambe tin e reto aki den e area di Urologia, Oncologia y asina por sigui menciona.
Esey ta haci cu tin cu bay mehora esaki den 2023, e vocero di AZV a duna di conoce.
