Vocero Solange Tchong ta splica:
ORANJESTAD (AAN): Den entrevista cu Vocero di AZV, Solange Tchong el a papia riba e situacion di Orthodontics A. Kawaiah, kende no por traha mas, te ora su caso den Corte keda cla.
Tchong a splica cu den e caso di Kawaiah, ta papia di tratamentonan specialisa cu mester tin un machtiging (autorisacion) via AZV pa por bin na remarca. El a bisa cu gran parti ta referi na e grupo di clientenan cu ta cay bao di AZV, pero no directamente di e fondo di AZV pasobra cu tin e parti cu ta cay bao di AZV+.
El a indica cu AZV ta administra, banda di e pakete basico cu ta e seguro medico general, loke a wordo yama e AZV+. Esaki ta un seguro medico adicional cu ta wordo duna door di un dunador di trabao, den e caso aki Pais Aruba, pa cu su empleadonan publico.
Esey ta un gran mayoria di e clientenan cu ta haci uzo di e parti di ortodoncia cu ta den nan pakete.
Solange Tchong a laga sa cu tabata tin un caso den corte unda cu AZV a tuma nota di esaki y AZV mester a percura c'unbes c'un dunador di cuido, na momento cu tin un caso den Corte unda ta bay investiga of haya sa kico ta corecto of no, e ora AZV ta bisa cu e mihor manera ta pa para un rato e contract cu e dunador di cuido.
Ta warda un rato pa wak kico ta bay sali for di e caso di corte, a remarca.
Den e situacion ey, AZV a compronde cu den e caso aki e Orthodontics a laga sa cu e lo sigui mas leu y cu lo entrega un otro verzoek caba y ta bezig cu su pasonan lega.
Esey ta nifica pa AZV, a bisa, cu lo tin cu warda pa wak e situacion aki. E no ta algo cu AZV a scoge pa haci, pero e ta nifica cu eventualmente tin cu warda pa wak e caso den corte bin dilanti.
Tchong a splica cu e idea inicial tabata pa bisa cu no ta warda y cu ta laga e clientenan aki wordo pasa pa haya servicio cerca otro dunador di cuido. Esaki ta algo cu ta wordo evalua, pero no por bisa mucho ainda pasobra toch e otro banda di medaya ta cu tin como AZV pa sigui monitorea kico ta pasa den e parti legal.
AZV ta monitoreando esaki y pendiente di kico lo sali afo, e vocero a remarca. Si resulta cu di berdad mester kibra contract, den e caso aki cu e Orthodontics, e ora ey AZV lo avisa tur asegurado tocante e decision aki.
Aworaki esey no a tuma lugar pasobra tin cu brinda espacio pa e sistema huridico of legal haci su trabao y djeynan por tuma un decision concreto, Solange Tchong a declara.
Un di e decisionnan cu por bin ta cu ta termina e contract cu e dunador di cuido.
Pesey ta pidi e aseguradonan cu ta pashent di Dr. Kawaiah pa tuma nota di e situacion, pero pa sigui monitorea esaki pa wak kico ta bay bira e decision final di hues y di AZV pa cu e caso aki.
Relaciona cu e servicio mes, el a agrega cu tin basta asegurado cu ta riba lista di spera y dificilmente por pasa esakinan dilanti. Pero di otro banda, ta hunga un rol tambe cu tin cu warda un rato pa wak kico precis ta bay sosode.
Akinan tin dos escenario unda por resulta cu e dunador di cuido por sigui labora y di otro banda e por ta asina cu berdad ta resulta cu tin cu stop di biaha di traha cu su persona, a señala.
