Solange Tchong, Vocero:
*Ta premira cu e proceso lo por dura 2 luna of mas
ORANJESTAD (AAN): Vocero di AZV, Solange Tchong a splica cu mas detaye e tema di cambio pa exonera e pensionadonan di e pago pa remedi. El a indica cu den Conseho di Minister di 17 di december 2024 a bin un decision unda cu kier pa e pensionadonan por ricibi nan remedinan manera antes.
"Nos como AZV a haya e peticion aki y nos kier informa e aseguradonan di AZV cu nos ta bezig cu esaki. Pasobra di un banda bo tin e decision cu a wordo tuma, pero di otro banda tambe tin AZV cu tin cu bay ehecuta e decision aki", el a bisa.
Segun Tchong, AZV ta den preparacion di esaki. Ta evaluando con tecnicamente por ehecut'e. Tin e parti legislativo pa bay prepara y tambe tin e parti operacional. AZV tin cu bay wak bek con ta haci adaptacionnan pa haci esaki.
A wordo menciona cu entrante 1 di februari lo percura pa e pensionadonan ricibi remedinan den e Lista Positivo di AZV bek. Sinembargo, AZV mester informa cu a ricibi e decision ey di 17 di december 2024. Pero ta asina cu AZV ta den full preparacion pa esaki, e vocero di AZV a indica.
AZV tin cu keda cumpli toch cu e stipulacionnan cu tin den ley y den e caso aki, e parti tecnico-legislativo tin su caminda pa cana y tambe e parti tecnico operacional pa loke ta AZV mes. Esaki no ta decisionnan cu por maneha hopi lihe den sentido cu tin cu bay bek, y wak con ta organis'e pa asina por duna e aseguradonan di AZV esakinan, el a bisa.
Tchong a remarca cu den e fase ey AZV ta aworaki pa wak con ta otorga e beneficio aki bek na e pensionadonan. Ta premira cu e proceso lo por dura un of dos luna mas y kisas hasta mas tempo. Lo informa e aseguradonan ora ta asina ley, el a finalisa bisando.
