Tres studiante ta haya e oportunidad pa specializa via hospital
ORANJESTAD (AAN): AZV hunto cu profesionalnan local a desaroya un modelo di proyeccion pa futuro y den esey nan a tene cuenta cu e posibilidad pa locual ta wordo yama ‘witten’.
Witten ta nifica cu bo ta pone un persona cu tabata traha ‘preto’ (sin paga belasting), pa e traha normal.
“Na momento cu bo hinca nan den e modelo, e ta bay tin un impacto riba e gastonan y entradanan, pero e no ta mustra un situacion cu nos no por atende cune”, segun director di AZV Edwin Jacobs, en un entrevista cu DIARIO.
DIARIO a puntra Jacobs kico e plan ta pa AZV pa 2025, pa purba limita e cantidad di pashent cu mester wordo manda afo pa tratamento y logra trata mas na Aruba mes.
E director di AZV a bisa cu pa loke ta terapeuta fisico en todo caso a amplia cu dos mas.
“E problema di terapeuta fisico cu nos a constata ta cu hopi biaha e asegurado ta desea cierto terapeuta, pero nos ta trata cu un cap pa aña”.
Bo yega bo cap (limite) bo no por haya mas pashent, segun Jacobs.
El a sigui bisa cu otronan si tin mas espacio.
E director di AZV a duna di conoce tambe cu tin terapeutanan fisico cu a haya un contrato di AZV, cu ta traha parti time y ta laga un otro traha bao di nan y esey no ta husto.
“Na momento cu bo no kier traha mas fulltime bisa nos, pa asina nos por contrata un otro terapeuta fisico pa e yena e buraco”, segun Jacobs.
Pa loke ta e falta di specialista, a puntra e director kico pro ta e solucion pa e lista di espera di pashent no sigui ta largo.
Jacobs a indica cu ta buscando un solucion pa esaki den nos region.
El a duna di conoce tambe cu aña pasa AZV via hospital a duna un contribucion, unda cu hospital a duna tres hoben local pa specializa.
Uno ta den area di nanishi, garganta y orea, cu ta un specializacion cu ta dura 5 aña.
E dos otro studiantenan ta riba e tereno di neurologia, cu ta un specializacion di 6 aña.
Awor via ImSan AZV ta buscando un studiante pa specializa den retinologia.
