Ta hasta pensando di usa plataforma di Pay.Aw
ORANJESTAD (AAN): Pa aña 2022, AZV ta proyectando cu e gastonan di cuido lo costa un total di 483,5 miyon Florin. Mientras cu e placa cu AZV ta calcula di lo drenta den nan caha, ta solamente 434,2 miyon Florin. Esey ta un deficit di 58,9 miyon Florin.
Durante un conferencia di prensa convoca na sede di AZV den Rumbastraat na Playa, e director ing. Edwin Jacobs a recapitula loke e Aseguro General di Malesa ta pasando aden e aña aki.
Despues cu AZV a haya critica cu den 2020 supuestamente nan no a delibera suficiente ni ta suficiente transparente, Jacobs a bisa cu na 2022 a cuminza cu animo y cu transparencia.
Dia 17 di Januari 2022 a presenta na Comision di Salud na Parlamento, e “Plan 2022: Ban Reforma pa nos Garantiza”.
Den e plan aki, AZV a identifica e diferente oportunidadnan cu tin cu lo por yuda nan yega na e 60 miyon Florin di recorte cu a wordo imponi riba nan. Despues di e reunion cu Comision di Salud, AZV a tene un conferencia di prensa unda a informa comunidad loke e Plan 2022 ta.
Dos dia despues, tur e dunadornan di cuido a ricibi un carta di AZV pa duna nan informacion di e plan.
“Planning ta uno, y ehecucion/implementacion ta otro,” ing. Jacobs a bisa. “Nos ta anuncia e Plan, y esey no nifica cu e ta cla pa ehecucion.”
El a mustra cu tin un proceso pa cu e Plan 2022, y den esaki a bin nota cu tin preocupacion den sector di cuido cu nan a compronde cu asina cu a anuncia e Plan e ta cla pa implementa. “Siendo cu esey no ta e caso, a djis anuncia e Plan pa ta transparente, pa asina comunidad no culpa AZV cu a presenta di un dia pa otro cu cierto accionnan”.
Jacobs a bisa cu den e proceso di prepara e Plan, nan ta bay ta informando debidamente den e proceso con e ta canando. Pero esnan den Sector di Cuido a expresa nan preocupacion, y Ministro dia 10 di Februari a yama reunion cu e grupo aki hunto cu AZV.
AZV a compronde e preocupacion, y a splica con e proceso ta. A papia di e asunto di Contribucion Propio (“eigenbijdrage”) y e Lista Positivo. Tambe a mustra cu tin e parti legislativo y e parti tecnico. E parti legislativo por drenta na vigor riba un fecha, pero no kiermeen cu tecnicamente ta cuminza e fecha ey tambe, pasobra bo tin di prepara bo mes tecnicamente pa bo por implemente. Pues tin un fase di transicion pa yega na e implementacion.
AZV a compronde e preocupacion di e Grupo, y e siguiente siman dia 17 di Februari, AZV a reuni cu e representantenan di Cuido. For di e siman prome caba a cuminza explora e posibilidad di uso di e plataforma di Setar NV, esta ‘Pay.Aw’ como un medio pa cu e Contribucion Propio.
ASPECTO LEGAL: A percura e ora pa e comision tecnico ey, y a invita un cupo na cuido. Dia 2 di Maart a bolbe reuni cu representantenan di Cuido riba e asunto di Contribucion Propio pa papia riba e consehonan legal cu a ser ricibi. Conseho legal ta mustra cu e cobranza di e Eigenbijdrage ta cerca e dunador di cuido, pasobra asina e ley a wordo concebi na 1992 caba! Pues Eigenbijdrage no ta algo cu a cay for di cielo na 2020 den e AZV 5 Wave Model.
Ora cu e ramenwet a wordo traha na 1992, a pone caba den e ley ey cu bo por introduci un eigenbijdrage pa frena consumo. Atravez di tempo a haci’e mas skerpi y a pone e responsabilidad di cobranza cerca e dunado di cuido. Esey a wordo mustra den e reunion dia 2 di Maart abiertamente na e representantenan di cuido pa mustra nan riba e conseho legal.
Esey ta e conseho, pero toch ta hunto tin di bay traha, pasobra tur hende tin necesidad pa e eigenbijdrage wordo introduci na un bon forma. Director Jacobs a bisa cu den ultimo 20 aña di existencia di AZV, diferente biaha tabatin Comisionnan Nacional y Institucionnan cu a papia riba introduccion di Eigenbijdrage. For di 2014 caba a cuminza papia pa esaki bin dilanti, como un efecto pa frena e cuido.
Manera ta conoci, e grupo di dunador di cuido tabata contra cu nan tin di bay forma full un ‘administratie’ nobo pa atende e cobranza aki, incluyendo busca un Cash Register, un Caha Fuerte, gasta placa pa Security Video Camera pa vigila tur esaki, y demas gasto pa e.o. un POS Machine pa Swipe y PIN.
Segun ing. Jacobs, manera cu bo ta bay preparando e implementacion AZV ta drentando den ehecucion di diferente aspecto di e Plan 2022.
