Destaho publico ta bay tuma lugar cu tur hospital di Colombia
ORANJESTAD (AAN): Ta bay tuma lugar un destaho publico pa loke ta e cuido medico na Colombia. Solange Tchong, Vocero di AZV a duna di conoce cu esaki ta un trayecto di pasado caba, 2019 unda AZV tabata bezig cu esaki y ya caba tabata mehorando varios parti di e proceso di cuido medico den exterior.
A agrega cu e ta referi por ehempel na e preparacion di un pashent cu tin cu sali pa bay Colombia pa haya cuido. Pero banda di esey tambe tabata bezig evaluando con por mehora e proceso un bez na Hospital na Colombia.
E señal cu AZV tabata haya di e pashentnan tabata cu ora di yega e prome afspraak ta bay lihe. E 'follow-up afspraak' no tabata bay mucho lihe of cos no tabata cana lihe pa nan por a wordo yuda.
Pesey AZV a dicidi cu ta bay mehora e proceso aki. Pero na 2019 a tuma e decision tambe di re-evalua tur fase di e proceso tanto di banda di e cliente, pero tambe di e doctornan mes, Tchong a indica.
El a sigui bisa cu a bin na e conclusion cu ta bon pa bolbe bay revisa tur contrato. Den pasado, na 2012, tabata e prome aña cu a pasa over di stop di traha cu broker y bay traha directamente cu e hospitalnan di Colombia.
Den e di dos evaluacion cu a tuma lugar na 2019, a yega na e conclusion cu ta hopi bon pa sigui traha cu Colombia, pero mester keda skerpi y monitorea e proceso aki y eynan ta unda a wak cu tin varios area cu por mehora. Esey ta locual ta bay haci, e vocero di AZV a splica.
Ta bay drenta den un destaho publico unda ta invita tur hospital di Colombia, cu por participa y ta califica. A traha un 'terms of reference', cual ta un documento cu ta indica tur e puntonan na cual e hospitalnan di Colombia mester cumpli cu ne, a bisa.
Entre otro, nan tin cu cumpli cu cierto acreditacion cu nan mester tin for di nan propio pais. Asina tin diferente area unda nan ta bay wordo controla pa percura pa bin cu e mihor oferta posibel.
Solange Tchong a remarca cu AZV ta bezig cu e destaho publico aki na beneficio di e pashentnan y di e fondo. AZV kier cumpra cuido medico accesibel, di bon calidad, pero na e miho prijs pa e aseguradonan.
AZV kier percura pa e cuido medico den exterior ta uno bon, pero na e mihor prijs y cu por cubri tur pashent, a manifesta. Semper tin entre 1000 pa 1400 pashent cu ta bay Colombia pa wordo yuda, Tchong a finalisa bisando.
