ORANJESTAD (AAN): Tratamento den exterior ta un tema cu a wordo treci dilanti durante un conferencia di prensa di Algemene Ziektekosten Verzekering (AZV).
Director di AZV, Edwin Jacobs a cuminsa bisando cu a drenta na vigor e decreto y entrante 1 di October 2022 lo tin diferente cambio riba e lista di remedi y ya caba a cuminsa cu e ciclo di informacion pa e dunadornan di cuido unda a duna informacion na docternan di cas, asistentenan di doctor, asistente di boticario, boticario, specialista, entre otro.
El a bisa cu e team di comunicacion di AZV lo percura pa e informacion yega na comunidad y pa esaki ta bay tin un 'media tour' pa duna informacion na e aseguradonan di kico e cambionan ta implica.
Tambe ta bay splica con pa uza e website di AZV pa por yega na e informacion y tambe ta bay tin un linea di ayudo. Esaki ta bay sosode den e proximo 6 siman caminda AZV ta bay ta trahando intensivamente comunicando na comunidad e cambionan pa asina entrante 1 di October introduci esaki riba e lista di remedi, Jacobs a indica.
