Dr. I. Tromp y Dr. S. Vallejo
ORANJESTAD (AAN): El a wordo confirma pa AZV. Segun OE AZV a contrata dos docter di cas nobo pa asina sigui brinda servicio medico di prome liña na su aseguradonan.
Ta trata aki di Docter di cas señora I. Tromp kende a tuma over e pashentnan di docter Dinant Esschendal (Noord), y Docter di cas señora S. Vallejo, kende a tuma over e pashentnan di docter Geraldine Alwani Croes (San Nicolas).
Gradicimento: OE AZV ta gradici docter Dinant Esschendal y docter Geraldine Alwani Croes pa tur cuido medico cu nan a brinda e aseguradonan. Ta desea ambos hopi exito den e caminda nobo cu nan a scoge p’e. Na mes momento OE AZV ta haci uzo di e oportunidad pa yama “bon bini” na e docternan di cas nobo, esta docter señora I. Tromp y docter señora S. Vallejo.
Docter di cas Tromp: Docter di cas I. Tromp a keda encarga cu e pashentnan cu antes tabata registra cerca docter Dinant Esschendal na Noord. Awor docter I. Tromp ta ofrece servicio na Eagle, desde su oficina na Caya Punta Brabo 17. Number di telefon ta 280-1358.
Docter I. Tromp for di hopi jong a bin Aruba unda e tabata alumno di Colegio Arubano. Despues el a biaha pa Hulanda pa cuminsa su trayecto dentro di mundo medico unda el a atend’e y finalisa exitosamente Hogeschool InHolland Haarlem (Medische Beeldvormende en Radiotherapeutische Technieken), Vrije Universiteit Amsterdam (Master Health Sciences) y Erasmus Medisch Centrum Universiteit (Geneeskunde). Na 2019 el a drenta e Huisartsopleiding Aruba pa specialisa como docter di cas.
Docter di cas Vallejo: Docter di cas S. Vallejo a tuma over e pashentnan cu antes tabata cerca docter Geraldine Alwani Croes na San Nicolas. Desde su oficina nobo, ubica na Pastoor Hendrikstraat 5, servicio medico ta sigui y pashentnan por yama pa traha cita na number 585-3213.
Docter S. Vallejo ta naci na Aruba, tin 28 aña y tabata alumno di Colegio Arubano. Pa cumpli cu su deseo di yuda hende, el a biaha pa Bogota, Colombia unda el a studia na Universidad El Bosque (medico cirujano) y despues a sigui e specialisacion como docter di cas.
Invitacion AZV app: Na mes momento nos ta invita tur asegurado pa download e AZV app. Bo ta bay den Google Play of Apple App Store y type AZV Aruba pa haya e logo (icono) di AZV y cuminsa e download. Pa esnan cu ta haya cu mester di ayudo cu e AZV app, por email na This email address is being protected from spambots. You need JavaScript enabled to view it. of por pasa na e oficina na Rumbastraat 21 na Camacuri.
Uso di e AZV app ta facil ya cu por primi pa sende e boton di notificacion y asina continuamente haya informacion di seguro AZV.
