PR di DAS, Jesseline Soto-Kelly ta splica:
ORANJESTAD (AAN) -- Departamento di Asunto Social (DAS), a yama un conferencia di prensa unda cu Jesseline Soto-Kelly, Relacionista Publico, a duna informacion tocante e ayudo financiero extra cu gobierno ta dunando tur persona cu ta haya bijstand, pa e aña escolar 2022-2023.
“Manera nos tin custumber, tur aña gobierno di Aruba ta duna un ayudo financiero extra pa tur esnan den bijstand, cu ta den edad di entre 3 cu 24 aña, y cu ta bishita un scol regular, durante dia.
Esaki ta consisti di dos tipo di ayudo: uno cu nos ta yama Schooluitkering, y e otro cu nos ta yama Onderlijke Bedrage”, Jesseline Soto-Kelly a menciona.
El a splica cu Schooluitkering ta pa yuda cubri e gastonan cu ta encera cumpramento di articulonan di scol, y esaki ta consisti di un suma di 220 florin pa cada persona pero cu un maximo di 800 florin pa famia.
E ayudo aki ta wordo paga hunto cu e bijstand di luna di September, cual proximo ta dia 10 di September.
E Ouderlijke Bedrage, ta pa yuda cubri e gastonan di contribucion di mayor na cada scol, y esaki ta 120 florin pa cada persona cu ta bay scol, entre 3 cu 24 aña.
“E suma aki no tin un maximo mara na dje pero e ta wordo paga directamente, na scol. Si nos tin cu bisa cu e suma na contribucion di e mayor na scol, ta mas caro cu 120 florin pa aña, e ora ey e mayor mes mester paga e diferencia. Si ta menos cu 120 pa aña, locual e ta esey ta wordo paga”, Jesseline Soto-Kelly a señala.
PR di DAS a splica ken ta bin na remarca pa haya e ayudo aki. El a indica cu tur persona entre 3 cu 24 aña cu ta cobra e bijstand normal, of e bijstand pa un persona cu limitacion entre 3 cu 24 aña y cu tabata riba e payroll di bijstand den e luna di Augustus, kiermen e ultimo luna cu a wordo paga, ta bin na remarca.
“Bo mester bay un scol regular durante e dia. Kiermen, scol preparatorio, basico, secundario, middag Mavo, Scol Duna Un Man. Y bo mester ta ricibiendo e 250 di toelage, mensualmente.
Na scol mes, desde entrante 19 di Augustus, por a bay busca e formulario di schoolverklaring di Departamento di Asunto Social, yene completo y bon, y entregue segun e schedule di entrega cu e persona a haya ora a cobra bijstand den luna di Augustus.
“Bo a haya un papel, riba dje nos ta reparti e entrega segun e leter di bo carnet di bijstand. Esaki pa e por bay organiza y structura otro siman. Anto, riba e ultimo dia cu ta Diabierna, nos ta duna un biaha mas e oportunidad cu si pa un of otro motibo, no por a acudi riba bo dia stipula, bo por bay na Departamento di Asunto Social na San Nicolas, ex-centro medico, y entrega esaki”, PR di DAS a splica, agregando cu tur mester wordo entrega na San Nicolas.
