ORANJESTAD (AAN): Recientemente Scol Basico Xander Bogaerts na San Nicolas a ricibi bishita di e talentoso dama Ayra Kip, kende actualmente ta bibando na Hulanda.
Por cierto, Ayra ta un ex-alumno di e scol y tin actualmente su mesun compania di uitgeverij. Den pasado na comienzo di decada di 2010, Ayra y su ruman Ira tabata activo cu e gran actividad y evento ‘Art Rules Aruba’ riba e isla aki.
Ayra a bin scol awor na Aruba, pa trece bukinan pa nos muchanan cu afirmacion nan importante y positivo! Sigur un bon fundeshi pa e auto estima di nos muchanan.
E donacion di e bukinan aki tabata posibel cu ayudo di Xander Bogaerts Dare to Dream Foundation.
E muchanan di Scol Basico Xander Bogaerts, y e maestronan sigur ta hopi contento cu e donacion aki. Masha masha danki di Curason.
