Parlamentario Darlaine Guedez-Erasmus (MEP):
ORANJESTAD (AAN): Ayo Rock Formation ta un patrimonio nacional cu tin un historia impresionante pa cual tin pinturanan hopi bunita di indjannan, barancanan grandi, matanan unico, bestianan y sigur un lugar cu por relaha y disfruta. Diahuebs 28 september 2023 e fase uno di renobacion di Ayo rock formation a wordo completa. Un aña y mey pasa a cuminsa cu e trabounan pa restaura e parke pa nos local y turistanan por sigui bishita.
Renobacion Fase 1
Den e fase uno a renoba e caminda di cana, a pone railsnan di metal pa seguridad riba e ruta cu e personanan ta cana. Tambe a renoba e dak di e cabañanan, a traha un brug di palo na e parti cu e rooi ta drenta den Ayo. A pinta e tralinan pa asina proteha e cueba cu e pinturanan di e Indianan. Na e entrada parti pafor y na e entrada parti paden a traha 2 bunita borchi, uno pa identifica Ayo y pa yama bon bini na tur bishitante y e otro pa duna mas informacion y direccion di e ruta pa cana.
Renobacion Fase 2
Dentro di poco lo cuminsa cu fase 2. Esaki lo ta encera QR code pa mientras personanan ta cana den e parke, riba celular ta haya tur informacion di e lugar. Ayo rock formation sigur ta un atraccion turistico hopi popular y como local nos tur tin bunita recuerdonan di nos infancia eynan. Sea cu a bini den grupo como scout, plan vacacional, cu scol of a comparti hunto den famia. E parlamentario ta kier invita pueblo di Aruba pa tuma e oportunidad pa pasa mira con bunita Ayo rock formation ta.
Parlamentario Darlaine Guedez-Erasmus ta kier gradici y felicita e comision completo cu ta consisti di Departamento di gobierno, na instancianan no gubernamental y semi-gubernamental, Ministernan y nan Ministerio. Aki nos por mira cu trahando hunto ta logra pa Aruba sigui bay dilanti.
