Hopi hende awor durante nan cita ta buscando mas plachi number
ORANJESTAD (AAN): Desde mitar di luna di December aña pasa caba a cuminza ta reparti plachi di number di auto 2025 na clientenan cu a cuminza haci cita. Pero na comienzo a mira un trend cu mayoria hende cu haci cita, ta djis bay busca 1 solo plachi. Ta un man yen di hende so tabata probecha pa a busca 3 of te hasta 5 plachi (pa nan famia, amigo, of coleganan) durante nan cita.
Segun Meverly Romano kende ta relacionista publico di DIMP, aworaki nan ta notando cu e trend a cambia y esnan cu a traha cita, ta buscando mucho mas cu un solo plachi pa cada afspraak.
E ta algo bon bini pa esnan di DIMP, como cu cada cliente cu busca mas plachi, ta yuda cu mas y mas automobilista por tin nan plachi nobo di 2025 den nan poder.
Pago di Impuesto: Romano a indica cu aworaki meymey di luna di April 2025, nan tin en total 94.074 number registra. Esaki ta un cantidad basta grandi, mirando e hecho cu na Januari 2025 nan tabatin 92.887 number. Pues di Januari pa awor na April, e cantidad di numbernan oficialmente registra a crece cu 1.187 plachi. Y e cantidad aki ta cambia tur dia, pues constantemente tin registracion di autonan nobo.
Di tur e numbernan aki, DIMP a ricibi solamente pago pa 58% voljaar di e totalidad aki. Es decir, cu solamente 54.373 a paga voljaar 2025. Anto tin un total di 25%, cu ta 23.987 number cu a wordo paga halfjaar 2025.
Pues en total, 78.358 number a cumpli cu pago di impuesto pa 2025. Esaki ta representa 83 porciento, y ta un satisfaccion enorme pa DIMP. Pasobra a logra pasa e nivel di 80% di pago, segun Meverly Romano a indica.
Algun sin pago: Esaki nifica cu tin un cantidad di persona cu a haci nada di pago pa e nummerplaat di 2025, y esaki ta 14% di e total, cu ta 13.455 plachi. E cantidad mas grandi ta den categoria di A-nummer cu un total di 11.749 plachi cu no tin pago mes riba dje den 2025.
DIMP ta costumbra cu esey, pasobra semper tin parti di automobilista cu no ta haci pago. Logicamente ta bay yega momento cu nan tin di haci pago, y si acaso tin debe atrasa, nan lo mester cumpli cu eseynan tambe. Corda sinembargo cu “areglo di pago” pa impuesto di motor na Aruba no ta posibel.
Tin algun automobilista cu ainda debe pago di 2020 te cu 2024, y pa nan por haya plachi di number nobo aki, nan lo tin di paga tur eseynan atrasa (incluyendo boet), pa porfin por haya e plachi blauw.
Romano a splica cu ta yegando e 2ndo ‘Deadline’ di aña, cu ta 30 di Juni 2025 y esnan cu a paga halfjaar, ya desde fin di Februari caba por a cuminza paga poco-poco pa asina nan ta cla cu esaki.
