Meverly Romano, PR di DIMP:
*DIMP ta pidi pa elimina e debe mas pronto posibel
ORANJESTAD (AAN) – Meverly Romano, Relacionista Publico di Departamento di Impuesto (DIMP), a duna di conoce den entrevista cu DIARIO, cu DIMP tin reunionnan regularmente cu e departamento concerni unda cu nan ta informa tocante e incumplimento cu pago di impuesto cu tin, door di compania of personanan cu tin un number, cu ta mara na un vergunning.
“Nos ta papia aki di taxi, V-car, O. E companianan aki ta haya e datonan di incumplimento cu nos tin registra di e personanan aki, pa motibo cu nan vergunning ta mara tambe na cumplimento di pago belasting. Nan ta haya e datonan for di nos, regularmente”, Romano a menciona.
El a agrega cu na momento cu un persona tin un vehiculo di motor e tin obligacion di paga e belasting, pero e supervision y toezicht si ta un plachi cu ta mara na vergunning esey ta den man di un otro departamento.
Unico cos ta ora un persona ta bin DIMP pidi un V-number of un TX number, e mester presenta cu su permiso. Esey si, DIMP ta controla pero riba caminda e toezicht y cumplimento ta den man di polis y Departamento di Transporte Publico.
Meverly Romano a señala cu na e momentonan aki, un persona cu no a paga su impuesto di 2024, ta bay haya su mes ta paga boet, cu ta 50% di e suma cu ta habri.
“Mi lo recomenda, na nomber di Departamento di Impuesto, cuminza elimina e debe ey, pasobra un djis aki ta bin aña 2025 y e debe ta keda bira mas halto e ora ey. Nos ta pidi pa no postpone e pago mas, cumpli cu ne y tene cuenta cu nos ta ofrece e sistema di pago parcial”, Meverly Romano a reconfirma.
El a sigui bisa cu ora cu Januari pasa, por cuminza sigui paga tiki tiki, pa ora cu e deadline di Juni yega, ya e pago ta completamente haci.
PLACHI’I NOMBER:
Pa esnan cu tin plach’i nomber (esnan cu na luga di number ta uza un nomber of letternan), y e motociclistanan tambe, corda cu nan no ta haya e posibilidad di paga e belasting den dos biaha pa aña; nan mester paga esaki di un solo biaha.
“Pues ora Januari yega nan mester tin paga e belasting completo. Por ehemplo pa plachinan personaliza e tarifa ta mas halto tambe. E ta sea 600 florin pa aña, of mil florin si bo auto ta diesel. Djis pa nan, ora cu e plachi of e tarifa ta mas halto, pa nan ta hopi conveniente pa haci e pago parcialmente, desde September, pa ora Januari yega ya nan a cumpli cu ne completamente”, Meverly Romano a subraya.
E ta reitera cu esaki ta algo cu DIMP ta recomenda. Mirando e cifranan pa plachi di nomber tin aworaki un incumplimento di 122. “Kiermen tin 122 plachi di nomber aworaki cu ta riba caminda cu no tin pago mes, di aña 2024. Naturalmente, esey no ta e comportamento mes cu nos kier pa nos automobilistanan y nos ta recomenda pa kita e debe aki mas pronto posible pa e debe no keda acumula”, PR di DIMP a conclui.
