Minister Ursell Arends hopi satisfecho:
*Tur 7 miyon a wordo paga
ORANJESTAD (AAN) – Minister di Transporte, Integridad, Naturaleza y Asuntonan di Adulto Mayor, señor Ursell Arends, den un entrevista cu DIARIO a elabora tocante su reunion cu trahadornan di Serlimar, recientemente, y e motibo di esaki.
E dignatario a duna di conoce cu e motibo di e encuentro cu Serlimar ta cu tin hopi desaroyo positivo ta tumando lugar, tanto pa e compania como pa su trahadornan.
Manera ta conoci, Arends a señala, Serlimar tabata den bancarota. “E tabata tin siete miyon na debe cu varios comerciante y companianan y siman aki, e ultimo pago a wordo haci. Pues e siete miyon aki, tur a wordo paga, y aworaki Serlimar no tin debe cu ningun hende mas.
“Y fuera di esey tambe a haci pago na e trahadornan, tanto nan periodiek, nan promocion y nan overtime cu Serlimar tabata debe e trahadornan, esaki tambe a wordo paga y mi ta kere cu aworaki, esey tambe ta duna perspectiva na e trahadornan den e direccion cu e compania ta bay” e dignatario a indica.
Minister Arends a expresa si, cu esaki no kiermen cu e compania ta sali for di “intensive care y ta cla pa hunga futbol”. “Tin trabaonan ainda cu mester tuma lugar y el a duna e trahadornan e perspectiva kico ta e proyectonan cu mester tuma bay lugar durante 2024, y nos kier pa Serlimar drenta bek den procesamento di desperdicio. Gerencia, conhuntamente cu raad ta trahando riba esaki, y mi ta kere esey ta tambe ta duna trankilidad na e trahadornan y perspectiva cu e compania aki ta bay sigui desaroya pa e tambe ta competitivo den e parti di desperdicio”, Arends a acentua.
E mandatario a agrega cu di un total di 167 trahado, cinco di nan cu ta ambtenaar nan proceso mester cana atravez di Landsbesluit, y tambe cu e maneho di gobierno cu ta data for di 1995 y hancra na 2008, cu ta permiti cu como minister, como gobierno, nos por bay bek ora ta trata bevordering (promocion) te cu tres aña.
“Esey tambe ta loke mi a splica e trahadornan, y mi mester bisa cu mi ta sinti cu nan tabata hopi positivo. Danki na nan cu nan a duna nos e espacio tambe pa den e añanan aki nos por a haci e coreccionnan, traha pa nos por a cumpli cu nan, pero tambe zorg pa e compania ta den e ruta positivo”, Minister Ursell Arends a señala.
E mandatario a agrega cu Serlimar tin un total di 35 ambtenaar y e ta e unico Suigeneris cu nunca a yega mas leu di ta un Arbeidscontractant. Esaki ta algo cu e minister a discuti cu Gerencia y cu e discusionnan mester tuma lugar ainda cu e trahadornan, pa wak kico ta e decisionnan cu nan kier tuma. Na 2022, e dignatario a splica, el a institui un Comision Interministerial, cu a duna conseho na su ministerio y cu Serlimar, tanto Gerencia como e raad, mester atende cu ne pa wak kico ta e posicion cu nan ta bay tuma.
