ORANJESTAD (AAN): Desde cu isla di Aruba tabata e prome cu a introduci e proceso di yena e informacion di Embarkation/Debarkation (ED) na forma online, awor por mira cu ta mas isla den Caribe ta sigui introduci esaki.
Awor ta isla di Dominica ta drenta e epoca di modernismo, cu nan proceso di inmigracion transformando di papel pa sistema online. Esaki lo mehora e experiencia di viaheronan y haci proceso di inmigracion mas rapido.
Tabata Diabierna 18 di October cu Dominica a lanza su plataforma digital di Inmigracion, pa asina pasaheronan por yena nan formulario prome cu nan subi avion, pa asina elimina e necesidad di yena papel.
E cambio pa un sistema completamente digital ya a bira un trend amplio den Caribe, como cu e otro islanan a reconoce e importancia di haci e proceso mas facil pa turistanan cu ta yegando.
Ademas di Aruba, awor e islanan manera Bahamas, Barbados, Bermuda, Curaçao, St. Lucia, St. Kitts, Jamaica, St. Maarten, Tortola, y Republica Dominicana ta usando plataforma digital pa yena informacion di aterizahe y tambe ora di sali bek di e islanan.
E otro islanan aki hunto cu Aruba a reconoce e balor di haci e experiencia di viahe aun mas facil pa e turistanan. Tin mas pais cu ta trahando pa introduci nan mesun ED Card Digital, incluyendo Trinidad & Tobago. Nan plan ta pa kizas bin cune den 2025, aunke ainda no a duna un fecha exacto.
