Compania crusero no kier a mira video di actonan sexual publicamente
ORANJESTAD (AAN): Varios di e pasaheronan cu Diaranzon siman pasa a yega Aruba cu e barco ‘Harmony of the Seas’ di Royal Caribbean, no a cumpli cu reglanan di fatsun y etica ora cu nan a cuminza cana rond riba e isla.
Pero awor a bin sali na cla, cu basa riba loke a yega di socede den pasado, cu e compania Royal Caribbean International a yega di pasa den situacionnan similar riba e barco mes, y pesey e biaha aki pa e viahe di Februari 2023 cu nan a charter full e barco crusero, di antemano a stipula reglanan estricto pa evita cu situacionnan di pasado bolbe socede.
Tur pasahero haya buki di regla: Y pesey mes, e pasaheronan riba e viahe ey cu a wordo yama ‘biggest gay cruise in history’ den Caribe, a ser pidi pa nan abstene di upload video di contenido sexual cu nan ta filma abordo di e barco.
E viahe crusero, organiza pa e tour operator Atlantis Events pa 5.400 huesped, a haye obliga na inclui e reglanan nobo aki den un buki cu a ser distribui na tur pasahero bao di un seccion yama ‘Important - New Social Media Policy’.
E buki ta indica cu nan ta spera cu tur hende diverti durante e crusero, toch ‘tin cierto limite” di loke ta wordo permiti riba e barco y ta pidi huespednan pa nan tene ‘respect’ na tanto Royal Caribbean, e personal, y demas pasaheronan.
“Por fabor no publica nada demasiado sexual riba social media den un foro publico of otro lugar online,” segun ta skirbi den e buki. “Cualkier pasahero cu ta pone of upload un potret explicito cu ta publicamente visible, of video, lo wordo pidi pa bandona e barco y lo no haya placa bek. Esaki ta aplicable tambe pa post riba media priva cu por identifica sea Atlantis Events, demas marcanan, e barco, of otro pasahero cu of sin permiso.
Den pasado, video di actonan sexual abordo di viahenan similar pa e comunidad di gays, a wordo poni riba social media, como tambe plataforma priva manera OnlyFans y tambe Just For Fans.
E compania Atlantsi Events a bisa cu e regla nobo a wordo crea riba peticion di Royal Caribbean International, cu no kier pa nan marca wordo ‘conecta’ cu e contenido di video.
E viahe y su ruta: Tabata Diasabra 4 di Februari 2023 cu e barco a sali for di Fort Lauderdale na Florida, y Dialuna 6 di Februari e barco a pasa y keda nuebe ora na e isla priva di Labadee na parti nort di Haiti.
Diaranzon 8 di Februari e barco a ancra na Aruba pa un bishita di diescinco ora largo. A compronde cu a tarda basta pa e pasaheronan a baha na Aruba, como cu e anochi/marduga prome nan a keda festeha basta hopi. Pues hopi di nan tabata wayaba mainta, y te despues di merdia a baha. Diahuebs 9 di Februari el a bishita Curaçao pa un estadia di diez ora largo.
Despues di esey e viahe a regresa Fort Lauderdale, y tur pasahero a baha bek Diadomingo 12 di Februari 2023.
