Abogado mr. Dello Gomez:
ORANJESTAD (AAN) – Den un entrevista cu Abogado mr. Dello Gomez, relaciona cu e peticion cu VWI a haci na Ministerio Publico, pa investiga Utilities Aruba tocante e EOI pa mas energia di biento, a splica cu desde 1 di September 2021 Aruba a conoce su Codigo Civil nobo, den cual su di dos buki tin un capitulo cu ta regarda entidadnan legal.
Entidadnan legal kiermen Fundacion, Asociacion, NV of VBA. E ta un ley cu a wordo moderniza y esey ta pone cu awo VWI tin hermentnan na su disposicion cu antes no tabata tin.
Un di e hermentnan aki ta cu un accionista minoritario di un compania, of un miembro di directiva di un fundacion of asociacion, ta haya cu e algo no ta cana na e manera corecto, den e entidad legal eynan, e ora ey e por bay Hof, Corte di Apelacion y pidi pa e Hof y experto haci un investigacion pa wak si enberdad e asunto ta cana manera mester ta.
Gomez a agrega cu den e caso aki, VWI como sindicato, no ta forma parti di e directiva di WEB, tampoco ta accionista ni comisario. Pues, pa VWI e tres posibilidadnan no tey, pero mescos ley ta duna oportunidad si bo ta un interesado y VWI como sindicato tin un rol den esaki, e por haci un peticion na Ministerio Publico cual obviamente a wordo entrega Diamars.
E peticion na e momento aki na Ministerio Publico ta pa repasa e carta y si nan ta haya cu ta necesario, e ora ey pa pidi como un partido neutral, pasobra no ta algo penal, criminal of haciendo uso di otro autoridadnan, pero cu nan conocemento huridico y imparcial cu nan tin, pa ora na nan turno nan pidi hof pa e apunta un of mas experto pa wak e ora ey con cos ta can a den e compania, mr. Gomez ta reitera.
E compania cu e investigacion a wordo pidi riba dje ta Utilities Aruba NV. Esaki pa motibo cu Utilities Aruba NV ta esun cu ta accionista di WEB Aruba NV, cu ta apunta e comisarionan, y cu tin tur cos di bisa den WEB.
Abogado Dello Gomez a señala cu den cualkier otro compania cu tin e tres organonan ey, cu tin nan rolnan y nan tareanan, nan obligacionnan y responsabilidad, tanten cu eseynan ta den balansa, e ora ey un entidad asina ta funciona bon. Den e caso aki, segun VWI e balansa no tey. Pesey nan mester sali di e eskema ey, cu legalmente por aplica y cana e caminda di Ministerio Publico pa hiba nan na hof y hof pone nan den investigacion.
El a remarca cu kizas esaki ta e prome biaha cu e instrumento nobo aki ta wordo aplica na Aruba, y sigur den e contexto aki, pero e Isla ruman Corsou, e buki #2 na unda esaki a wordo haci posible, ya ta existi pa hopi aña caba.
Na Corsou tin ehempelnan concreto unda cu accionnan similar a wordo haci, y a wordo honra. A bin investigacion y den dje a sali bastante iregularidad afo. Pues, e ta un instrumento cu ta traha y nos tin confianza den dje cu e lo traha akinan tambe. Si saca afo cu algo iregular ta tumando lugar, esun cu lo beneficia ta e comunidad henter. Asina Dello Gomez a conclui.
