Parlamentario Evelyn Wever-Croes:
ORANJESTAD (AAN): Mientras cu departamentonan manera Crisis Management Office (CMO) ta bon prepara pa maneho di crisis, tin falta di liderazgo fuerte y transparente. Asina Parlamentario pa Fraccion di MEP den Parlamento, Evelyn Wever-Croes a afirma den un entrevista na DIARIO. Segun e parlamentario, e crisis cu Aruba ta enfrentando door di e situacion geopolitico den region, ta hopi complica cu por trece hopi problema pa Aruba, y ta rekeri liderazgo fuerte cu ta duna informacion na nos comunidad.
E parlamentario a menciona cu e ta sigur cu CMO y otro institutonan ta prepara pa cualkier eventualidad cu pasa den nos region, pero ta enfatisa cu sin un liderazgo di e opperbevelhebber, esta Prome Minister Mike Eman, no lo yega unda cu mester yega. “Nos problema na Aruba no ta cu no tin e conocemento of no ta prepara di parti di e departamentonan concerni pa maneho di crisis. Nos problema ta di liderazgo zwak y e falta di transparencia di nos gobernantenan”, Parlamentario Wever-Croes a expresa.
Segun e Parlamentario, ta hasta pa aloca fondo den departamento pa reenforsa nan, ta mustra un falta di liderazgo di Prome Minister Eman. Pasobra e prome cos cu mester haci pa reenforsa departamentonan, ta placa. Y segun e parlamentario, awo tin placa. Gobierno a cera un presupuesto cu 70 miyon Florin cu ainda no a wordo aloca niun caminda. Mientras cu e no realisa cu ta importante pa aloca fondo pa reenforsa e departamentonan cu mester e empuhe aki, lo no logra esaki.
