Ministro Dangui Oduber ta insisti
ORANJESTAD (AAN): Minister demisionario di Salud Publico, Dangui Oduber ta contento cu despues di hopi aña ta duna atencion na salario di tanto specialistanan medico como tambe tur personal di cuido. Aruba a pasa den momentonan sumamente dificil caminda mester a tuma decisionan NO popular y doloroso pa asina por garantiza cu e fondo di AZV ta keda uno sostenbibel. Nan ta bisa na hulandes “Na regen komt zonneschijn” y awe por mira cu tur esfuerzonan cu a worde haci ta duna su frutonan.
Danki na un crecemento historico den turismo cu a percura pa un crecemento nunca antes bisto di nos economia cu na su turno a traduci su mes den e situacion financiero positivo pa AZV. E situacion financiero aki a percura cu a tuma e decision den conseho di minister dia 17 di december 2024 cu lo duna remedinan back na nos pensionandonan. Gabinete Wever-Croes 2 a tuma e decision cu nos grandinan no mester paga mas pa nan remedinan, cual AZV a informa caba cu lo dura algun siman pa haci cambionan necesario pa esaki por drenta na vigor.
Ademas for di aña pasa 2024 a laga haci un estudio pa mehora e posicion laboral financiero di specialistanan medico. Gobierno a bisa na varios ocasion cu awor cu e situacion financiero a mehora danki na e maneho cu a worde hiba mester duna atencion na e “hende”. Di e forma aki gabinete Wever-Croes 2 a paga ambtenaarnan 11.7% indexering y a percura pa miles di hende no mester paga ni loonbelasting ni inkomsten belasting mas.
Minister Dangui Oduber a pidi AZV pa percura pa duna aumento di salario na tanto specialistanan medico como tambe TUR dunador y personal di cuido na Aruba. E peticion como Minister di Salud a bay caba pa AZV, pasobra esaki ta e momento, unda tin e espacio financiero pa brinda e posibilidad aki.
