ORANJESTAD (AAN): Aruba College Fair Foundation (ACFF) ta cla pa e evento cu studiante y mayornan ta warda riba dje.
Aruba College Fair 2024 lo tuma luga awe Diabierna 8 di November, y Diasabra 9 di November, for di 1:00 pm pa 7:00 pm, den Renaissance Convention Center na Playa. E evento ta fungi como un herment util pa un studiante scoge con pa avansa nan estudio.
“Ta e miho manera pa haya tur informacion y wak kico en berdad cada estudio ta encera pa asina evalua cua ta pas miho cu nan y kico carera profesional por tin den futuro,” esey President di ACFF, Muzaninn Wever a indica.
“Aruba College Fair ta pa un y tur; studiante di EPB, MAVO, HAVO y VWO buscando un estudio di nivel MBO, HBO of WO; studiante di EPI of Universidad di Aruba cu kier continua cu nan estudio na Aruba of den exterior y hasta e profesional cu kier sigui avansa academicamente.”
DIARIO a haya sa, cu pa edicion 2024, Aruba College Fair a confirma e participacion di institutonan di Hulanda, Merca, Canada, Centroamerica, Caribe y Aruba, ademas di companianan manera Hospital y WEB Aruba N.V.
E prome Aruba College Fair a tuma luga na 2000 como un iniciativa di ministerio di enseñansa, sinembargo a pas’e over na un fundacion pa sigura su continuacion despues di a ricibi hopi elogio for di e comunidad. ACFF ta un organizacion sin fin lucrativo cu e obhetivo di trece e mundo di institucionnan universitario y di educacion superior mas cerca di e studiantenan Arubiano. E ta brinda e posibilidad di haci pregunta directo na representante tocante e scol, e ciudad, e facultadnan, bida riba campus, etc.
