ORANJESTAD (AAN): Cada aña, riba 24 di maart, mundo ta conmemora Dia Mundial di Tuberculosis.
Esaki ta un dia dedica na crea consciencia riba un enfermedad cu, apesar di progreso medico, ainda ta cobra bida, esta Tuberculosis (TB).
TB ta un enfermedad infeccioso cu ta afecta principalmente e pulmonnan y ta ser transmiti pa aire ora un persona infecta tosa of niester. Na nivel mundial, miles di hende ainda ta infecta cada aña. Esaki ta mustra cu, apesar di tecnologia y conocemento moderno, e lucha contra TB no a termina ainda.
Pero con esaki ta toca Aruba?
Aruba, como un isla cu hopi movimento di hende, turismo, migracion y contacto internacional, no ta ‘inmune’ contra TB. Aunque e cantidad di caso normalmente ta relativamente abou, e riesgo semper ta presente. Un solo caso no detecta na tempo por crea un cadena di transmision.
Screening, investigacion di contacto y guia medico ta parti di e estrategia pa controla e enfermedad. Pero realidad ta cu, prevencion no ta solamente tarea di doctornan, ta responsabilidad di cada ser humano.
Ciudadanonan mester mantene alerta pa sintomanan manera tosamento persistente, cansancio extremo y perdida di peso. Busca ayudo medico na tempo y sigui tratamento completamente si wordo diagnostica. TB ta curabel, pero solamente si e tratamento wordo sigui cu disciplina.
Dia Mundial di Tuberculosis no ta simplemente un recordatorio global. Pero un dia pa na Aruba tambe nos reflexiona riba esaki pa keda alerta. Pasobra den salud publico, un cos ta sigur: preveni semper ta mas poderoso cu cura.
