ORANJESAD (AA): Awe, 20 di october 2025, mundo ta celebra Dia Mundial di Estadistica bou di e lema “Estadistisa y data di calidad pa tur hende.”
Estableci pa Nacionnan Uni, ta pone enfasis riba e rol importante cu data ta hunga den desaroyo, politica, y transparencia.
Pa Aruba, e celebracion aki tin un significado special. Data no ta simplemente number. E ta e compas cu ta guia nos isla den su desaroyo. Den sector di turismo, labor, medio ambiente of educacion, estadistica di confiansa ta yuda tuma decision basa riba realidad y necesidad di nos pueblo.
Central Bureau of Statistics (CBS Aruba) ta na centro di e esfuerzonan aki. Cu dedicacion y profesionalismo, CBS ta compila, analisa y publica data oficial riba temanan esencial manera demografia, costo di bida, mercado laboral, importacion y exportacion, educacion, y bienestar social. CBS a inverti den modernisacion digital, plataforma di data online, y formacion continuo pa su personal. Esaki ta indicacion di un instituto cu ta traha pa transparencia y calidad.
Un indicado importante di transparencia ta e Open Data Inventory (ODIN) — un evaluacion global crea pa Open Data Watch cu ta mira con completo y con accesibel estadistica oficial di un pais ta. Den e resultadonan di ODIN 2024, Aruba a saca un score di 45 for di 100, cu un rango di 136 na nivel mundial. E cifranan aki ta un señal di progreso, pero tambe un recordatorio cu tin espacio pa mehora.
E Dia Mundial di Estadistica ta un yamada pa accion. Institutonan publico, sector priva y sociedad civil na Aruba, hunto mester promove alfabetisacion di data, pa henter pueblo por compronde y uza estadistica.
Uza estadistica pa inspira innovacion y fortalece confiansa. Data no ta simplemente number. E ta conocemento, empoderamento, y e base di confiansa. Cada cifra ta conta un historia, y hunto, e historia aki ta forma futuro di Aruba.
