Inclusion no ta un favor, e ta un derecho
ORANJESTAD (AAN): Awe, riba Dia Mundial di Down Syndrome, laga nos reafirma nos compromiso. Nos ta celebra bida, talento y luz di tur persona cu Down syndrome, y nos ta honra e famianan, maestro, y cuidadornan, kendenan tin mester di hopi amor, pasenshi y forsa pa cuida, yuda y proteha nos ciudadanonan cu e condicion aki.
Cada aña, riba Dia Mundial di Down Syndrome, mundo henter ta uni pa crea mas consciencia y comprension tocante Down syndrome. Na Aruba, e dia aki no mester pasa manera un celebracion simbolico so, pero como un momento serio di reflexion y accion concreto. Ta tempo pa nos como un comunidad uni, mira mas profundo con nos sociedad ta trata, apoya y integra e personanan cu Down syndrome den bida diario.A pesar di e pasonan positivo cu a tuma den añanan cu a pasa, ainda tin hopi reto.
Tur mucha mester ricibi e guia y recurso necesario pa nan por desaroya nan potencial completo. Sistema di educacion inclusivo mester bira un prioridad, unda cada mucha, sin excepcion, ta sinti su mes balora y capas. Inclusion no ta un favor na nos muchanan special, e ta un derecho cu nan tin.
Den mercado laboral, mundialmente oportunidadnan ainda ta limita. Personanan cu Down syndrome tin talento, disciplina y un deseo sincero pa contribui. Sin embargo, falta di oportunidad structura ta laga hopi di nan keda na banda. Sectornan y organizacionnan tin un rol crucial pa crea espacio pa diversidad. Esaki no solamente ta corecto moralmente, pero tambe e ta fortalece e meta social y economico di nos mundo henter, tambe di Aruba.
Den sector di salud, inversion continuo ta esencial. Famianan mester sinti cu nan no ta nan so. Apoyo profesional, terapia y orientacion mester ta accesibel y consistente. Un comunidad fuerte ta un comunidad cu ta cuida di tur su miembronan.
Pero talves e reto mas grandi ta e mentalidad social. Inclusion real ta cuminsa cu respet, comprension y aceptacion. Ora cu comunidadnan move for di e fase di ignorancia of falta di conocemento, nos ta avansa pa celebracion di diversidad. Personanan cu Down syndrome no ta defini pa nan condicion, nan ta individuonan cu personalidad, talento y un balor inmenso pa aporta.
Henter comunidad, gobierno, sector priva,y institucionnan educativo mester traha hunto. No ta suficiente pa papia di inclusion. Nos mester practic’e tur dia. Un Aruba realmente fuerte ta uno unda tur persona tin su luga, su bos y su oportunidad. Pasobra ora tur persona ta wordo balora, nos comunidad henter ta bira mas fuerte, mas humano y mas uni.
