Tema 2024: “Kibrandi barera, cerando brecha”
ORANJESTAD (AAN)—Awe, Diahuebs 14 di November, ta Dia Mundial di Diabetes. E tema decreta pa Organizacion Mundial di Salud y Organizacion Panamericano di Salud, pa e aña 2024 aki, ta “Kibrando barera, cerando brecha”, pa reforza nan compromiso di reduci e riesgo di diabetes y garantiza cu tur persona diagnostica cu tin malesa di sucu, haya acceso na un tratamento y atencion igual, integral, accesible y di calidad.
E organizacionnan menciona ta aporta e siguiente datonan clave tocante diabetes:
Diabetes tipo 1 no por wordo preveni. Diabetes tipo 2 cu frecuencia por wordo preveni a traves di dieta saludabel, actividad fisico regular, mantene un peso fisico normal y evita humamento.
Diabetes ta un di e principal malesanan causante di ceguera, insuficiencia renal, atake di curazon, accidente cardiovascular y amputacion di p ia.
Diabetes por wordo trata y su complicacionnan por wordo evita of retrasa cu testnan regular.
Personanan diabetico mester somete nan mes na pruebanan periodico di deteccion trempan di complicacionnan. Esaki ta inclui prueba di deteccion di malesa renal, examennan periodico di bista, y evaluacion di pianan.
Stop di huma cigaria ta reduci e riesgo di desaroya diabetes tipo 2, entre 30 pa 40%.
Diabetes ta wordo asocia cu, aproximadamente, e doble di riesgo di sufri di tuberculosis (TB) y un riesgo mayor di tuberculosis multi-resistente. Personanan cu ta padece di diabetes cu tuberculosis tin doble posibilidad di fayece durante e tratamento di TB y doble riesgo di tin recaida un bez cu e tratamento ta finaliza.
Solamente rond di 50% di e personanan cu diabetes tipo dos ta obtene e insulina cu nan mester, hopi biaha pasobra e sistemanan di salud di nan pais no por permiti esaki.
