Sa bo riesgo... sa kico pa haci
ORANJESTAD (AAN): Fundacion Diabetes Aruba (FDA) ta invitabo pa forma parti di e diferente actividad en conexion cu Dia Mundial di Diabetes 2023.
E aña aki e campaña mundial ta enfoca riba e importancia di sa bo riesgo di haya diabetes tipo 2 pa yuda retrasa of preveni e condicion aki. Na mes un momento resalta e impacto di e complicacionnan relaciona cu diabetes y e importancia di tin acceso na informacion y cuido corecto pa garantisa tratamento y maneho na tempo.
Uno den cada 10 adulto rond di mundo tin diabetes. Mas di 90% tin diabetes tipo 2. Cerca di e mita no ta diagnostica ainda. Na momento cu diabetes no worde detecta y trata na tempo esaki por hiba na complicacionnan serio cu por potencialmente pone bida na peliger.
Den varios caso diabetes tipo 2 y su complicacionnan por worde retrasa of preveni door di adopta y mantene habitonan saludabel.
ACTIVIDADNAN: For di 14 pa 20 di November forma parti di e “Sucu Challenge Nacional”. FDA ta invitabo pa ban hunto KICK OUT sucu agrega pa 1 siman. Pa mas informacion tocante e challenge aki, bishita e medionan social di Fundacion Diabetes Aruba of bishita e website:
Riba Diaranson 15 di November cuminsando di 6:30pm FDA lo ta na MFA Noord, hunto cu One Happy Island Lions Club y PraktijkOndersteuners (POH) brindando chekeo di sucu/presion gratis y charla interactivo tocante diabetes y nutricion.
Den colaboracion cu One Happy Island Lions Club y PraktijkOndersteuners (POH), FDA lo bishita diferente scol basico cu e KiDS program. E meta di KiDS ta pa colaboracion cu POHnan y One Happy Island Lions Club, cu e meta pa conscientisa nos muchanan y scolnan tocante diabetes tipo 1 y con pa hiba un bida saludabel pa preveni diabetes tipo 2.
Diamars 28 di November FDA lo duna tambe su di dos charla educativo pa docentenan tocante diabetes tipo 1 y con pa preveni diabetes tipo 2. Scolnan tin un rol importante den bida di nos muchanan door di forma nan educacion. Promove educacion di diabetes y estilo di bida saludabel den ambiente escolar por yuda segura un futuro saludabel y prospero.
Fundacion Diabetes Aruba ta brinda curso Prisma Diabetes desde aña 2019 pa empodera personanan cu ta biba/diagnostica cu diabetes. Y diasabra awor 18 di November FDA ta inicia su tan espera prome curso di Prisma Prevencion. Pa personanan na riesgo pa haya diabetes tipo 2 por ehempel: personanan pre-diabetico, persona cu sobrepeso/obesidad of esnan cu tin diabetes den famia.
E curso aki ta brinda conocemento y habilidad pa persona por maneha su salud, y asina influencia e factornan di riesgo pa preveni e posibilidad di haya problema riba termino largo. Registration pa e curso aki a sera caba, pero interesado por registra pa keda na altura di fechanan nobo na 2024.
Sa bo riesgo y kico pa haci ta importante pa por preveni, detecta trempan y haya tratamento na tempo. Forma parti di un di actividadnan menciona y tuma control di bo salud!
