Clifford Rosa, director Fundacion Rancho ta anuncia:
- Na Biblioteca BNA na San Nicolas
ORANJESTAD (AAN) Den conferencia di prensa, e director di Fundacion Rancho, señor Clifford Rosa, a anuncia diahuebs ultimo, un actividad cu ta bay tin pa awe, Diasabra 24 di Januari, cu ta e fecha cu e fundacion kier inicia su proceso di eventonan, y esaki ta e prome pa 2026 cu lo tuma lugar na Biblioteca Nacional Aruba, na San Nicolas, den e Sala Esmeralda, entre 6 or di atardi y 8 or di anochi.
“Pa nos e ta un encuentro; un momento di combersa unda cu nos ta bay toca diferente tema, y sigur un di nan ta e 200 añanan di Oranjestad cu aworaki ta bay bira 200 aña di relacion diplomatico entre Colombia y Paisnan Baho Nederland, pa mi e Reino, mirando cu ainda falta investigacion pa nos caba di conclui den ki situacion Aruba lo por ta den un celebracion di 200 aña diplomatico”, señor Clifford Rosa a señala.
“Nos ta bay toca temanan cu tin di haber cu Status Aparte, sigur nos ta bay toca temanan cu ta cay bao di ‘Aruba National Trust’. Pakico ANT a bin mes, ta pasobra nos ta miembro tambe di ‘International Trust Organizations’, cual ta enfoca riba e sistema pa conserva e herencia cultural y natural. Y esey ta duna nos tambe e espacio pa nos desaroya y dialoga tocante e tema di con nos por conserva e herencia di Rancho, Oranjestad y Aruba completo. Esey ta locual nos ta bay expande nos vision, na manera di bisa, y nos horizonte y asina nos ta duna educacion y concientizacion di herencia cultural, natural, na tur hende rond di Aruba” Clifford Rosa a indica.
E evento aki lo tuma lugar awe, Diasabra 24 di Januari, den Sala Esmeralda na BNA San Nicolas, di 6’or di atardi pa 8’or di anochi.
“Nos ta invita nos stakeholders y comunidad di Aruba, y tur esnan interesa riba e tema aki, pa ta presente y asina nos reflexiona y dialoga un poco tocante di esaki”, Clifford Rosa, director di Fundacion Rancho, a declara.
