ORANJESTAD (AAN) Awe, Dialuna 14 di April, ta wordo conmemora e di 94 Aniversario di “Dia Mundial di Las Americas”,
cual obhetivo ta resalta e soberania, y e union existente, entre e Republicanan Americano, di forma boluntario, dentro di un Comunidad Continental, pa alcanza e paz y solidaridad entre e pueblonan.
E dia importante aki tabata tin su prome celebracion na aña 1931, aña den cual a decreta dia 14 di April como e fecha unda e Republicanan Americano a wordo crea. E alianza aki, awendia, ta conoci como e Union di e Estadonan Americano cu a bira despues e Organizacion di Estadonan Americano (OEA), cu a wordo funda na aña 1890.
E berdadero proposito para su creacion ta busca e via mas idoneo pa crea, entre e paisnan cu ta conforma e Continente Americano, un clima di hermandad, husticia social, solidaridad y paz.
Na aña 1948, tempo cu na Colombia a tuma lugar e encuentro entre 21 pais, a establece acuerdonan dirigi na estabiliza e paz y seguridad di e Continente Americano, y tambe a compromete na traha den cooperacion mutuo pa consolida e democracia di e pueblonan y, na no interveni den e asuntonan interno di cada nacion.
Ademas, a establece e firme proposito di busca un solucion pacifico pa cualkier tipo di conflicto cu por sosode entre e Estadonan Miembro.
Awe, mas cu nunca, ta necesario reivindica tur e habitantenan di e parti aki di mundo, cu a perde nan rikeza y cu a bira victima di sakeo, violacion di nan derechonan, y mas importante ainda, e perdida di nan berdadero identidad.
P’esey, purba di rescata e historia y cultura di e pueblonan original, ta un responsabilidad di e gobiernonan cu awendia ta maneha e mundo, peo semper desde e base di respet y evitando ripiti e mesun erornan, door di cual e humanidad mester a paga un prijs hopi halto.
