Axcel Figaroa, Lider di TOPA, tocante edificio di KIA:
ORANJESTAD (AAN)-- Axcel Figaroa, Presidente di Sindicato TOPA, a sigui splica, den su entrevista cu Matutino DIARIO relaciona cu e Instituto Coreccional KIA, tocante e reunion cu TOPA y otro sindicatonan tabatin cu Minister di Husticia Arthur Dowers, den cual nan a toca e cuater puntonan cu tabata tin pendiente.
Segun Figaroa, nan a papia tocante busca personal nobo y e mandatario a splica cu eynan nan ta haciendo un estudio riba dje con pa bay aumenta e personal cu ta traha directamente cu e prizoneronan.
“Nos a palabra cu den tres siman nos lo sinta bek y eynan nos lo scucha na unda el a busca solucion, pasobra tabatin diferente opcion, cu nan ta sondeando pero mi no ta bay den detaye cu esey, pasobra ainda mester wak con pa yega na dje. Pero si ta haciendo esfuerzo pa bin mas personal”, e lider sindical a reitera.
Figaroa a agrega cu nan a papia tocante mas punto, entre otro e edificio, y esey nan ta bezig cu ne. “Esey nos ta warda kico ta e desaroyo riba dje. Awe, lo bay tin un presentacion na unda cu nos ta bay haya mas informacion tocante e edificio”, e lider sindical a informa, siman pasa, den entrevista cu Matutino DIARIO. Pa loke ta trata e structura nobo di salario, a bin diferente punto, y segun Figaroa, e por compronde pakico tin bruhamento, pasobra atravez di añanan diferente director a bin na KIA.
“KIA no conoce un director stabil pa un temporada largo. Anto, cada un cu bin tin otro ideanan cu cambionan, etc., anto hopi di e cambionan ey a trece bruhamento tambe, den e structura di e Institucion. Aworaki, nan ta analizando hunto cu e structura di henter e aparato gubernamental pa bin cu un structura cu lo keda vast”, Figaroa a señala.
E ta completamente di acuerdo cu esaki, pero pa bin berdad cu un structura fiho cu no ta bin cambio cada bez riba dje.
“E cambionan ta loke ta trece e problemanan cu nos ta enfrentando aworaki. Riba dje, e structura di salarionan nan ta bezig cune pa full e aparato gubernamental, y parce cu Minister di Husticia ta e prome cu nan lo bay repasa. Esey ta duna nos toch e chens cu pronto lo tin un cambio. Naturalmente, mi no sa si e cambio ta pa miho; esey ta otro asunto. Mi tin cu bisa cu nos a papia cu e minister y a discuti varios aspecto, y ta mustra cu ta bay tin boluntad, pasobra e interes ta cu nos ta bay reuni aki tres siman, sinta bek pa papia, anto eynan nos lo haya mas informacion vooral pa loke ta trata mas personal pa e Instituto KIA”, Axcel Figaroa, Presidente di Sindicato TOPA a conclui.
